Muqdisho (Caasimada Online) – Dowladda Federaalka Soomaaliya ayaa si adag u cambaareysay go’aanka ay Dowladda Kolombiya ku aqoonsatay sheegashada Israa’iil ee ku aaddan madax-bannaanida Buuraleyda Golan.

Soomaaliya ayaa sheegtay in aqoonsi kasta oo noocaas ah uu yahay mid aan waxba ka jirin, isla markaana uu ka hor imanayo sharciga caalamiga ah iyo Axdiga Qaramada Midoobay.

Dowladda Soomaaliya waxay adkaysay in Buuraleyda Golan uu yahay dhul Suuriyaan ah oo ay Israa’iil haysato, iyadoo diidday tallaabo kasta oo lagu aqoonsanayo sheegashada Israa’iil ee dhulkaasi.

Soomaaliya waxay sidoo kale ku baaqday in khilaafka u dhexeeya Israa’iil iyo Suuriya lagu xalliyo wada-hadal iyo hab nabadeed, iyadoo la dhowrayo mabaadi’da sharciga caalamiga ah.

Dowladdu waxay xustay muhiimadda ay leeyihiin qaraarrada Qaramada Midoobay ee khuseeya Buuraleyda Golan, kuwaas oo xaqiijinaya xaqa Suuriya u leedahay dhulkeeda.

Soomaaliya ayaa sheegtay in dhulka Suuriya lagu haysto ay tahay in si buuxda loogu soo celiyo dalkaasi, iyadoo lagu salaynayo xuduudihii jiray ka hor dagaalkii 1967.

Dowladda Federaalka ayaa ugu dambeyn ugu baaqday dhammaan dowladaha, oo ay ku jirto Kolombiya, inay dhowraan sharciga caalamiga ah, ixtiraamaan madaxbannaanida iyo midnimada dhuleed ee dowladaha, ayna ka fogaadaan aqoonsiga dhulalka la haysto.