Ka la 21 Phupu 1912 ho ile ha timela Robert Henry Dyke, mosuoehlooho oa sekolo sa Thabeng, Morija, ebile e le moruti oa kereke ea Hermone, Mafeteng, moo sengoli sa libuka Thomas Mokopu Mofolo se ileng sa kolobetsoa teng.
Staff Reporter
Robert Henry Dyke o hlahetse Lesotho ka 1850. Ntatae e ne e le moruti Hamilton Moore Dyke, ea hlahetseng Scotland ka selemo sa 1817. Hamilton Moore Dyke o ile a fihla Lesotho ka 1839, moo khaitseli ea hae Sarah Dyke a neng a nyetsoe ke moruti Eugene Casalis, ’me ba lula Thaba Bosiu.
Sarah Dyke ke eena ea ileng a ruta basali ba Basotho ho loha, ho roka le ho pheha bohobe bo pakuoeng.
Lelapa la Mofolo le sekolo sa Ha Khojane
Ka 1853, Hamilton Moore Dyke o ile a isoa Mafeteng moo e ileng ea e-ba moruti oa pele oa kereke ea Hermone. Ke moo a ileng a ruta lelapa la ha Mofolo, le neng le jakile Ha Khojane, ho bala le ho ngola.
Lelapa leo le ne le kenyelletsa Jimisi (James) Mofolo le moena oa hae Ramofolo, ea ileng a rehoa Abner ke baruti. Abner ke ntata Thomas Mokopu Mofolo.
Robert Henry Dyke le kereke ea Hermone
Robert Henry Dyke o holetse Mafeteng, ’me le eena a fetoha moruti. O ile a nyala Aline Mabille e le mosali oa hae oa bobeli. Aline e ne e le morali oa moruti Adolphe Mabille, mothehi oa koranta ea Leselinyana la Lesotho.
Ha Aline Mabille e se e le ’mamoruti Dyke, o ile a theha mokhatlo oa bo ’M’abana, o ntseng o le matla kajeno ka har’a kereke ea LECSA.
Aline le monna oa hae ba bile le tšusumetso e kholo ho Thomas Mofolo tabeng ea ho ithuta le ho itahlela tumelong. Ka tataiso ea bona, Mofolo o ile a ngola buka ea Moeti oa Bochabela.
Bara ba hae le bongaka
Bara ba Robert Henry Dyke e bile ba bang ba lingaka tsa pele tsa sekhooa tse poraefete Lesotho. Ba ne ba le bane ka palo, ’me kaofela ba ile ba fumana lengolo la MBChB. Ba ne ba ithutetse bongaka habo ntata bona Scotland, ’me mosebetsi oa bona o ile oa pharalla litereke tsa Lesotho.
Selemo
Ketsahalo
1817
Hamilton Moore Dyke o hlahela Scotland
1839
O fihla Lesotho, lelapa la lula Thaba Bosiu
1850
Ho hlaha ha Robert Henry Dyke Lesotho
1853
Hermone, Mafeteng: moruti oa pele
1912
Lefu la Robert Henry Dyke, 21 Phupu
Lipale tse amanang: First African to write a novel dies
Lipale tse amanang: Priest is killed in Morija, cause is adultery
Mohloli o mong: Adolphe Mabille, Boston University School of Theology missionary biography.
