Tusia: Katherine Matuauto, Gvt Press. O le asō, Aso Sa, 30 Aokuso 2026, na tatala aloā’ia ai le Vaiaso o le Measina Samoa e ala i le Sauniga Lotu Fa’aleMālō.

“Samoa, o measina, o ā tatou meatotino ia. O mea ia tatou te fa’apelepele i ai..”

O le feau tāua lea i le saunoaga autu o le faamoemo sa momoli mai e le afioga i le Palemia, Susuga i le La’aulialemalietoa Leuaeta Polāta’ivao Fosi Schmidt.

“O la tatou aganu’u fa’atasi ai ma le talalelei o ni measina e tatau ona tatou apelepelea. O lo tatou fa’asinomaga lea..

“I le avea ai o i tatou ma tagatānu’u Samoa moni, e tāua lo tatou iloa po’o ai i tatou, o le ā la tatou mea o fai i totonu o Samoa a’o fea fo’i tatou te aga’i i ai..

“O le ute lenā o lenei fa’amoemoe, ina ia tapena atu i le asō le fa’atāuaina o ā tatou measina ma le lumana’i manuia o tupulaga talavou a Samoa e pei ona iai le asō sa tapenaina e o tatou mātua ua fai i lagi le folauga..

“O ananafi na tapena ai le asō. O le asō e tapena ai taeao. O taeao e tapena ai le lumana’i..

“Ia tatou fa’atāuaina lenei Vaiaso o le Measina e ala i le fa’aāogaina o ā tatou laei, taumafa, siva ma pese fa’aleaganu’u.”

O lenei fa’amoemoe o lo’o taulāmua ai le Pulega o Tagata Tafafao Maimoa mai Fafo le STA, ma le Matāgaluega o ‘Āiga ma Agafeso’ota’i i le fa’amalu a le Komiti o Tapenaga o Measina a Samoa o lo’o Ta’ita’ifono ai le afioga i le Palemia.

O se fiafiaga le fa’atasia ai o Ta’ita’i o le Mālō ma le mamalu o le atunu’u aemaise o le to’atele o tagata asiasi mai fafo e molimauina le ulua’i fa’amanatuina o le Measina i Samoa, i le agaga atoa ia fa’aolaola a tatou tu ma agaifanua fa’aSamoa moni.

O lea fa’amanatuga ua suia ai le Teuila e pei ona masani ai i tausaga ta’itasi ona ua mata’itūina e Ta’ita’i o le Mālō le tatau ona ‘ave la tatou fa’amamafa ma le fa’atāua iā tatou lava measina e pele iā Samoa.

Na maua fo’i le avanoa e maimoa ai le atunu’u i nisi o fa’afiafiaga fa’aleagaga mai ekalesia sa fa’aautāina a latou fa’afiafiaga i le ‘Tete’e atu i sauaga ma fuālā’au fa’asāina.

• E.F.K.S. ‘A’ai Niuē

• Metotisi Sekema Fou

• E.F.I.S. Tu’ufa’atasi [Fogāpoa, Vailima, Apia]

• E.F.K.S. Vaiala

• Nasareta Solosolo

• Metotisi Matafele

• Pese Autū, fatu fa’apitoa mo Talavou [Theme Song – E.F.K.S. ‘A’ai Niuē.

O le pine fa’amau lea o le fa’atāuaina ai e le Mālō o Samoa o la tatou talitonuga “E Fa’avae i le Atua Samoa,” e pei ona amatamea ai i le Sauniga Lotu Fa’aleMālō e talosia ai galuega o i lenei vaiaso i le fa’amanatuina ole Vaiaso ole Measina.

Ata Pu’eina: Leota Marc Membrere.

Ata Pu’eina: Leota Marc Membrere.

Latest posts by Govt Secretariat Press Release (see all)

Post Views: 341