Ua tuuina mai se poloaiga a le Faamasinoga Faaitumalo, i loia o loo tula’i mo le HRPP, ina ia tuuina atu mafuaaga tatau e lagolagoina ai talosaga mo le toe faitauina o faaiuga o palota mo itumalo e 10 lea ua i luma nei o le Faamasinoga.
E pei ona lipotia e le Talamua, o le taeao nei sa tuuina mai ai se poloaiga a afioga i Faamasino o le Faamasinoga Faaitumalo iā Matautia Leota Raymond Schuster ma Papalii Rosella Alalatoa, e agai atu i loia a le vaega faaupufai e Puipuia Aia Tatau a Tagata.
E tatau ona oo atu i le faaiuga o le asō, ua tuuina atu mafuaaga tatau mo le toe faitauina ao le’i tagofia e le Faamasinoga talosaga.
I se feiloaiga a le Ofisa Sili o le Matagaluega o Faamasinoga le susuga ia Papalii Taimalelagi John Afele ma le vasega o tusitala, na saunoa ai Papalii, “E 10 talosaga na faaulu atu e sui tauva o le HRPP e ala atu i a latou loia, mo se poloaiga e toe faitauina ai pepa palota.
Ua mae’a le toe faitauina o palota uma mo le Itumalo o Palauli 2, lea sa tasi lava le palota e vā ai le manumalo (Fiu Faaolatane Ponifasio Vasa) ma le tū lua (Faaolatane Fiu Tuala Iona Pa’o).
Peitai, o talosaga e 10 a sui tauva o le HRPP agai i sui o le FAST na manumalo i le faitauga aloaia a le palota, e le vavalalata ni fuainumera, se’i vagana ai Sagaga 3.
E na o le 22 palota e vā ai Sala Paulo Tuala Poto o le FAST (939) ma Tuala Olivetti Ah Him (917) o le HRPP.
Ae o nisi o sui tauva o le HRPP o loo tagi, e le’i ausiaina e i latou le tu lua, ae sa tulaga tolu i le tauvaga e pei o Aleipata Itupa i Luga ma Gagaifomauga 2:
O Aleipata Itupa Luga o loo tagi ai Fua’ava Saumalu Penaia (HRPP) e 210 ana palota. Ae na tulaga lua Alailesulu Faapalo Toomalatai ma ana palota e 218. E 136 palota e vā ai le sui tauva o loo tagi, ma Taufua Edmund Taufua o le FAST.
O le isi itumalo o loo talosaga ai le sui tauva o le HRPP sa tu tolu i le faitauga aloaia, o Gagaifomauga 2.
O Tologataua Sooalo Sioeli Alofaifo (HRPP) e 303 ana palota. E tulaga lua le sui tauva tutoatasi ia Falesaopule Seimaleula Vaialia e 310 ana palota.
Peitai e lē o talosaga Falesaopule. E 31 palota e vā ai Tologataua Sioeli ma le sui tauva o le FAST ua manumalo – Foisala Lilo Tuu Ioane.
I le itumalo o Aana Alofi 3, e 423 palota e vā ai le sui o le HRPP ia Niuapu Aloifaiva Tanuvasa (473) ma le sui o le FAST na manumalo ia Agaseata Tanuvasa Valelio (896).
I Aiga-i-le-Tai e 66 palota na va ai le sui tauva o le FAST ia Auapaau Mulipola Aloitafua (1169) ma lē o loo talosaga ia Mulipola Leiataualesā Leia Laki (1103).
O Faasaleleaga 1 e 141 palota e vā ai Leatigaga Matafai Lauina IIiga o le FAST (866) ma Pipi Pauli Tevita Tariu Sinapati o le HRPP (725).
I Faasaleleaga 5 e 80 palota e vā ai Vui I’iga Sione I’iga (468) ma Peseta Vaifou Tevagena o le HRPP (388) loo talosagaina le toe faitau o palota.
O Satupaitea e 100 palota e va ai Asiata Tavu’i Tafu Salevao (476) ma Lautafi Fio Selafi PPurcel HRPP (376).
O le itumalo o Alataua-i-Sisifo, e 45 le va o Taituave Lafaitele Taatiti (522) ma Aliimalemanu Moti Alofa (477).
O Aana Alofi 2 e 74 palota e va ai Aiono Dr Alec Ekeroma (547) ma le sui o le HRPP o lē sa avea ma faipule o le itumalo ia Aiono Tile Gafa (473).
Public Notices – Tauofoga o Taavale
Latest posts by Ganasavea Manuia Tafeaga (see all)
Post Views: 938
