Ua molia nei James Tuisavailuu Atua ma Fred Oliva Junior Papalii i le taupulepule e fasioti tagata, e fesootai ma le osofaiga i Ho Chi Minh City, Vietnam i le aso 21 Me 2026, lea na maliu ai Lemalu Lorenzo Tovia, ae manu‘a tigaina ai Sauni Sam.

O Lemalu Lorenzo ma Sauni Sam o ni tagatanuu Ausetalia, ae o loo manino foi a la piitaga i Samoa nei.

Na faamaonia e leoleo Samoa ma le Australian Federal Police (AFP), na molia Atua, 31 tausaga, ma Papalii, 33 tausaga, i le aso 10 Setema i lalo o le vaega 106 o le Crimes Act 2013.

O le faasalaga pito i maualuga mo lea moliaga o le falepuipui mo le olaga atoa.

Na tulai i laua i luma o le Faamasinoga i le Aso Lulu, 16 Setema, ma tatala ai i tua i aiaiga a le Faamasinoga.

O loo tuuaia e Leoleo Samoa, sa taupulepule Atua ma Papalii faatasi ma Vaa Joseph Vaa ma Steve Tafia, o alii talavou ia e toalua na pu‘eina e leoleo i Vietnam i le aso 24 Me, i le faatinoina o le osofaiga.

E tusa ai ma lipoti a leoleo Vietnam, na taunuu Vaa ma Tafia i Ho Chi Minh City i le aso 14 o Me ma mata‘ituina gaioiga a Lemalu ma Sam a o le’i tupu le osofaiga.

I ata na faasalalau e leoleo Vietnam ina ua mae‘a ona pu‘eina i laua, na ta’u tino ai e Vaa o ia na faapāina le fana, ae na ta‘ua e Tafia sa totogi ma auina atu i laua i Vietnam, la te saili ma faaoo le oti ia Lemalu ma Sam.

Sa galulue uma Vaa ma Tafia i le Unalei Rental Cars i Samoa, o se pisinisi a James Atua.

Sa tulai le AFP e fesoasoani i suesuega o lenei mataupu ma fesootai ai loa ma galulue faatasi ma le Matagaluega o Leoleo i Samoa.

I le faalauteleina o suesuega i Samoa, sa fesoasoani ai le AFP i leoleo Samoa i sailiiliga tau tupe, faatalanoaga o molimau, faapea suesuega faapitoa o faamaumauga e faaaoga iai masini faaonaponei.

Ua ta‘ua e leoleo, o ia suesuega ua mafua ai moliaga fou o le taupulepule e fasioti tagata.

Sa tula’i Jamea Atua ma Papalii Fred i luma o le Faamasinoga Maualuga I le Aso Lulu nei, ma tatala ai i tua (on bail) i aiaiga masani e taofia ai tusi folau ma saini i vaiaso taitasi i le Ofisa o Leoleo.

O loo faaauau pea taualumaga o le Faamasinoga, ma talia se aso e sueseuina ai le mataupu ma molimau a leoleo.

O alii talavou ia Vaa Joseph Vaa ma Steve Tafia, o loo taofia pea i laua i Vietnam. Ma o loo masalomia o James Atua sa faatonuina i la’ua e malaga i Vietnam i lalo o tusifolau sese, ma faaoo le oti ia Lemalu Lorenzo Tovia, sa fai ma taitai o le Coconut Cartel.

Latest posts by Staff Writers (see all)

Post Views: 66