Ua faamaonia mai e le Sui Komesina o Leoleo ia Leiataua Samuelu Afamasaga, le maliu o Mateo Peseta Kofe, e 44 tausaga le matua o Sinamoga,, ina ua mae‘a se osofa‘iga a Leoleo i lona fale i le Aso Faraile 28 Aukuso.
O osofa‘iga a Leoleo i mataupu tau fualaau faasāina. Ma o lē ua maliu sa mua’i molia mai i se osofaiga ia Tesema 2025.
Ua tuua‘ia e nisi o le aiga o Maddy e faapea, sa faaoolima Leoleo ia te ia i le taimi o le osofa‘iga.
Peita‘i o loo teena e le Sui Komesina lea tuua‘iga, ma ia faailoa mai e lē o iai i le taimi nei ni molimau e faamaonia ai sa faaoolima se leoleo i lē ua maliu. “E leai ni evidence i le taimi nei sa faaoolima ai se leoleo,” o le saunoaga lea a Leiataua.
Na ia faamaonia foi sa iai se isi tagata i totonu o le fale i le taimi na taunuu atu ai Leoleo, ma o loo faaauau nei su‘esu‘ega a le Vaega o Su‘esu‘ega o Soligatulafono (CID Criminal Investigation Division) i tulaga uma e ao ona oo iai.
“O loo uia uma le process o le suesuega e le CID e ala i tulafono ma faiga faavae o suesuega faapea..
“O loo ave ai foi le faamuamua ina ia mautinoa e manino mea uma i le maliu o lē ua maliu.”
Valaau le Taavale a le Falema‘i
Na faamaonia foi e Leiataua sa valaau le taavale a le falema‘i i le fale o Maddy i Sinamoga ma ave ai o ia i le falema‘i i Moto‘otua.
Peita‘i, e le‘i faamaonia mai e le Sui Komesina poo ā ni manu‘aga sa iai Maddy, ae poo ā foi tulaga tonu na mafua ai ona valaau le taavale a le falema‘i.
“Sa valaau le Ambulance ma ave ai foi i le falemai i Motootua mai lona aiga i Sinamoga…”
Na ia ta‘ua o loo iai foi nisi e mafai ona fesoasoani i le su‘esu‘ega, e aofia ai le aufaigaluega a le taavale a le falema‘i sa auai i le aveina atu o Maddy i Moto‘otua.
“Ae o loo faaauau suesuega i le taimi nei.”
Na fesiligia foi le Komesina o le Pulega o Tineimu ma Faalavelave Tutupu Faafuase‘i (FESA), Tanuvasa Petone Mauga ma ia faamaonia sa valaau atu le auaunaga a le FESA ma latou agai atu ai i Sinamoga pe tusa o le itula e 3 i le aoauli o le Aso Faraile.
E le‘i mafai fo’i e Tanuvasa ona faamaonia ituaiga o manu‘aga sa iai Maddy, ina ua oo atu le FESA.
Tuua‘iga a Uō ma Tagata e Latalata i le Aiga
E ui ina teena e Leoleo tuua‘iga o se faaoolima i le taimi nei, ae ua faailoa mai e nisi o uō ma tagata e latalata i le aiga o Maddy, lo latou talitonuga, sa faaoolima Leoleo ia te ia i le taimi o le osofa‘iga.
“Na fasi, fasi e leoleo si tama ona toe fetagofi lea vili le ambulance, ae ua leai, ua maliu lava si tama..”
Na ta‘ua foi e se isi uō ua latou faalogo i ni faamatalaga e faapea o loo taumafai le Matagaluega e tuua’i, o se overdose.
“E molimau lava le isi tagata sa iai i totonu o le fale i le taimi o le osofa‘iga, e ono mafai ona ta’u tino le mea na tupu.”
Ua saunoa Leiataua, “o loo ūia uma le process o le suesuega e le CID e ala I tulafono ma faiga faavae o suesuega faapea..
“O loo ave ai foi le faamuamua ina ia mautinoa e manino mea uma I le maliu o le ua maliu..
“Sa valaau le Ambulance ma ave ai foi I le falemai I Motootua mai lona aiga I Sinamoga..
“O la foi e iai nisi tagata e pei o le aufaigaluega a le Ambulance na avea i le Falemai e mafai ai foi ona maua nisi faamtalaga e uiga I le maliu o le ua maliu..
“Ae o loo faaauau suesuega I le taimi nei.”
O loo faaauau su‘esu‘ega a le CID.
O le Isi Tuua‘iga o le Faaoolima a Leoleo
O le maliu o Maddy ua tulai mai i lenei lava vaiaso na laga ai e le Loia Sinia, afioga ia Unasa Iuni Sapolu, se isi foi mataupu o loo ia tuua‘ia ai Leoleo i le faaoolima i se tasi o ana clients.
Na faasalalau e Unasa ni ata o le alii o loo iloa ai manu‘aga tuga i ona foliga, aemaise lava le itu o ona mata.
Na faamaonia e Unasa o lenei alii e 20 ma ona tupu ona tausaga, o se tamā foi e iai lona toalua ma le fanau.
Na ia talosagaina le faia o ni su‘ega faafoma‘i, e aofia ai se X-ray poo se scan, e faamautinoa ai, e leai ni manu‘aga i totonu o lona tino (internal bleeding).
Peita‘i, na faailoa mai e Leiataua, ua silia ma le 10 tausaga o sailia e Leoleo lea alii ona o ni tusi saisai sa iai faasaga ia te ia.
“Ua ova i le 10 tausaga o sue e leoleo i ana outstanding warrant of arrest,” o le saunoaga lea a Leiataua.
Na ta‘ua e Leiataua sa sola lea alii ina ua taunuu atu Leoleo ma sa tuliloa seia oo ina toe maua.E tusa ai ma le faamatalaga a le Sui Komesina, sa tetee i taumafaiga a Leoleo e pu‘e mai ia.
“Na aafia i le taimi na taumafai ai leoleo e faatino le arrest ae refuse, ma aafia ai i nisi o vaega ma pa‘ū ai.”
Peita‘i ua finau Unasa, e tusa lava poo ā ni moliaga poo ni tusi saisai o loo faasaga i se tagata, e lē tatau ona avea lea ma mafua‘aga e faaoolima ai Leoleo ia te ia.
“How can the police be trusted to look after a man who they seriously assaulted, when they are the ones who assaulted him in the first place?” o le fesili lea a Unasa.
Ua tuua‘ia e Unasa e silia ma le toalima Leoleo na faaoolima i lana client.
Na ia ta‘ua foi na ave le alii i le falema‘i, ae mulimuli ane ave loa e taofia e Leoleo e aunoa ma le faia o se X-ray poo se scan e faamautinoa ai pe iai ni manu‘aga i totonu o lona tin
O loo faaauau su‘esu‘ega i tulaga na mafua ai le maliu o Maddy Kofe, ma e le‘i faailoa aloaia mai e Leoleo se mafua‘aga o lona maliu.
Latest posts by Staff Reporters (see all)
Post Views: 1,784
