𝐒𝐨’𝐨’𝐮𝐩𝐮 𝐚 𝐥𝐞 𝐌ā𝐥ō O le taeao o le Aso Faraile, 21 Aokuso 2026, na fa’atino ai le ifoga aloā’ia a le afio’aga o Sale’apaga i lumā maota o le Maota o le Mālō, FMFMII i Matagialalua, aga’i i le afioga i le Ta’ita’i o le Mālō, Susuga i le La’aulialemalietoa Leuatea Polāta’ivao Fosi Schmidt fa’apea le Mālō Tuto’atasi o Samoa.
O le ‘auga o lenei ifoga, ua momoli aloā’ia mai ai le fa’ato’esega a’o se fa’amauālaloga mai Tupu ma E’e, o Tamāli’i ma Failauga, aeā le lavaloa o le afio’aga, e tusa o ‘upu masoā ma lafoga lē mafaufau [tulou], na gagana ai se tasi o ali’i o le afio’aga.
O lenei alii ua molia i luma o le Faamasinoga, e igoa iā Aumaga Aloali’i, 49 tausaga le matua, ma ia fa’amata’u ai i le Ta’ita’i o le Atunu’u.
O ni lafoga e matuitui, o ni lafoga e ogaoga, o ni ‘upu ua fa’aālia ai le leai o se vā tapu’ia, e tosi ai le tausia o le mamalu, ma le fa’aaloalogia o tamāli’iaga, a’o le fa’asinomaga o le Ta’ita’i o le Atunu’u.
O le loi fofoga maligi, na molimauina i le taeao o le asō, o saunoaga ua o’oo’o, ma ua tau i le tumutumuga fetalaiga, ona o lagona o’otia i le matuitui ma le ‘o’ona o ‘upu sa lalafo.
O le afioga i le La’aulialemalietoa, o se tamafanau a le afio’aga, ma ua moni ai ‘upu a le atunu’u, afai o le ā lē malu i fale, o le ā lē malu fo’i i fafo. Peita’i, o tu ma agaifanua fa’asamoa moni, ua fa’atino i le taeao nei, o lagona molipō ia, o le apepele i loto ma fatu o so’o se Sale’apaga moni, o le latou tama na tausi, ua ia ta’ita’ia le sā folau o Samoa.
O le ifoga, o se tu a’o se aga e pine fa’amau ai, le loloto ma le mauālalo o le matagā, o se agasala ua faia e se tasi, ua ta’uleagaina ai se afio’aga.
Ta’utino le afio’aga o Sale’apaga, e tumau pea le lagolago, a’o le opogi a le afio’aga ma le Itumālō Palota o Lepā, i le ta’ita’iga a le afioga i le La’aulialemalietoa ma le Vaega Fa’a’upufai a le Fa’atuatua i le Atua Samoa ua Tasi [F.A.S.T.].
“E ma’eu le fa’amauāluga, ma le matagā o le mea ua tula’i mai. O se tasi o Tapa’au fa’atoā se’ei i se tasi o suafa, e le’i atoa se tausaga, ma o ia lea, ua na ‘ave valeina le tōfā ma le fa’autaga i le pa’ia o le afio’aga nei. E! Mata e, o maasiasi e,” fetalaiga pa’ū mai le fofoga o se tasi o Tapa’au o Sale’apaga.
Na talia ma le loto mauālalo e le afioga i le Palemia ma lona Faletua le afioga iā Tauānu’ufaigā lenei ifoga, e pei ona la fa’aui’eseina ai le ie o le mālō, na pulolou ai le pa’ia o le afio’aga e tusa o le latou fa’ato’esega.
Peita’i, e le’i ‘alo saunoaga a le afioga i le Minisitā o le Matāgaluega o le Soifua Mālōlōina iā Va’aaoao Salumālō Alofipō sa fai ma Sui o le Mālō e pale feagai ma le pa’ia o le afio’aga.
Saunoa Va’aaoao, o se lagona fa’anoanoa, a’o se loto ua nutimomoia, ona ua lē manatu ane i lana tama na tausi, o le tama o le ‘ele’ele, ae se’i seu silasila ane fo’i, i le fa’aeaea a Samoa aoao, ua filifilia ai e le Atua, le Susuga i le La’aulialemalietoa e avea ma Palemia o Samoa.
The best ICT Solutions firm in Samoa and the Pacific.
E ofo le loto, e sola manatu, ua naumati ai fa’alogona, afua i se a?
Auā ua fasi pupula lava, a’o tilotilo atu.
O le fa’amanatu a Va’aaoao i le afio’aga, ia fua se tapu, ia fai ni ai o le feiloā’iga aloā’ia lenei, ma ia manatua, o le Ta’ita’i o le Mālō, e tausi va’a tele e Samoa aoao. Auā a lavea lou ‘ā’ao, e logo i lou faiai [tulou].
Ina ua tu’u le avanoa i le Ta’ita’i o le Mālō, na ia fa’aālia ai lona lagona fa’anoanoa tele, ona o le tulaga ua tupu mai, ma ia ta’utino ai, o le ifoga i le asō, o se pine fa’amau, o lo’o ia malu lava i fale, ma ua ia mautinoa fo’i, e malu i fafo.
Afua i se a? Auā o lo’o amanaia lana ta’ita’iga e Sale’apaga. E ui lava i le matuitui ma o’ona o fa’alavalava i le sasa i le ao ma le po, e ala i lafoga masoā ma le lē mafaufau ua lalafo atu iā te ia, ma ua olopalaina ai lona fa’asinomaga. Peita’i o lo’o inu pea le ‘o’ona, ma tatalo i le Atua e fesoasoani mai.
Ma e le’o ‘auāoa le lagi, i le silafaga a le Atua i mafatiaga o feagai pea ma ia ma lona ‘āiga i le ao atoa ma le po.
O le tatalo a le Palemia i le afio’aga o Sale’apaga ma le Itumālō o Lepā, ia talo se fa’atasiga atoa a le Itumālō, se’i laolao i fale lo la va fa’afeagai ai ma le Faipule o le Itumālō, o le Ta’ita’i fo’i o le Itu Agai, Susuga iā Tuila’epa.
Saunoa le Palemia, e lē mafai, lē mafai, lē mafai lava ona fīlēmū ma fealofani Samoa, pe afai e tumau pea le fa’a’oloātaua o lo’o taulāmua ai Tuila’epa ma le H.R.P.P. O le talosaga a La’aulialemalietoa, ua mana’omia ona tula’i le Itumālō e taulāmua e fofō alamea le va fa’afeagai ai o ia o le Palemia, ma lo latou Faipule.
O popolega o le Ta’ita’i o le Mālō, ina ne’i alualu lenei fefulituaā’iga ma le fa’afelotoleagaa’i, tua i ni maseiga tatou te le’o mana’omia.
Ta’utino le pa’ia o le afio’aga i tamāli’i, ua tatau iā Tuila’epa, ona lagolago ma opogi le ta’ita’iga a si ona uso, e tino, toto, ivi ma ‘ā’ano i le Itumālō e tasi o Lepā.
Na tauāluga lenei fa’atasiga, i le fa’afetai i le Atua, ua i’u manū le feiloā’iga sa amata i le loifofoga ma le maligi o loimata, ona o se sala e mafua mai i le ola lē tapasāina.
Na feiloa’i fiafia le Ta’ita’i o le Mālō, o le pa’ia i le Kapeneta fa’apea le pa’ia o le afio’aga o Sale’apaga, ina ua mae’a lenei fa’amoemoe tāua.
O le ali’i sa ia faia nei lafoga lē mafaufau, ua i lima nei o le Tulafono, e tālia ai ona moliaga, e pei ona molia ai e le Matāgaluega o Leoleo, Falepuipui ma le Ola Toe Fuatā’ina.
Ata Pu’eina: Mālō o Samoa [Pesetā Tusiga Taofiga | Leota Marc Membrere].
Latest posts by Govt Secretariat Press Release (see all)
Post Views: 553
