Sa malaga atu i Fiti i le Aso Sā se teineitiiti Samoa e 14 tausaga le matua mo se taotoga mo lona gasegase o le fatu, ma o loo faatupe atoa e le Pasifika Specialist Healthcare Samoa Limited (PSH Samoa) lona togafitiga.

I se Faasalalauga Faalauaitele (Press Release) a le PSH Samoa, sa faapea mai ai o le vaai mamao a lē sa faatuina le PSH, ina ia avanoa tutusa uma tagatanuu o le Pasifika i togafitiga faapitoa ma auaunaga tau soifua maloloina faaonaponei.

Saunoa Tagaloafaaofonuu Parvish Kumar, o le Pule Sili o le PSH Samoa, o le a lē faailoaina le suafa o lea afafine, auā puipuiga tatau mo le fanau.

Ae o lea afafine ua leva ona aafia i se gasegase o le fatu e fesootaʻi ma le fiva rumatika.

Na siakiina o ia e le fomaʻi faapitoa o le fatu a le PSH, Dr Sanjeev Khulbey, a’o iai Doctor Sanjeev i Samoa nei mo le faamoemoe o le suaina o le eleele (groundbreaking) lea sa faia i le vaiaso na te’a nei.

“Sa oo mai le tala o le gasegase o lenei teineitiiti a’o iinei le matou vaega talu ai nei. Sa faatino le iloiloga a le fomaʻi ma faamaonia ai le manaʻomia ona faia o se taotoga i lona fatu.”

Ina ua maeʻa lea iloiloga, na ofo ai loa le Tagaloafaaofonuu Parvish, e tuuina atu le fesoasoani, ma fai ai le togafitiga e aunoa ma se totogi.

“O loo faatupe atoa e le PSH le taotoga i le PSH Nadi, faapea pasese mo le afafine ma lona tinā, ma le nofoaga e nonofo ai i lā’ua i Fiti..

Na saunoa Tagaloafaaofonuu, o lenei fesoasoani, o se avanoa ua mafai ai ona faatino se tasi o sini autū a le PSH Samoa, ina ia mafai ona maua e soo se tasi togafitiga faapitoa o loo manaomia.

“Na matou malaga mai i Samoa mo le suatiaina o le eleele mo le falemaʻi, ae o lea sa na tuuina mai ai foʻi le avanoa e fesoasoani ai i se alo talavou o Samoa ina ia maua le togafitiga o loo ia manaʻomia,” o le saunoaga lea a Tagaloafaaofonuu.

“O le uiga tonu lea o lenei vaaiga mamao. E lē na o le fausia o se fale. Ae o le faamautinoa, e mafai e tagata ona maua auaunaga faafomaʻi faaonaponei i taimi tonu e latou te manaʻomia ai.”

O lenei fesoasoani ua auala atu i le Pacific Specialist Healthcare Foundation. O se faalapotopotoga na faavaeina e Tagaloafaaofonuu, e fesoasoani ai i gasegase e manaʻomia togafitiga faapitoa, ae lē gafatia e i latou le tau.

E lagolagoina le faalapotopotoga o le PSH Foundation i foaʻi mai paaga a le PSH ma nisi ua togafitia e ana fomaʻi faapitoa, ma ua toatele tagatanuu o Fiti ma le Pasefika ua mafai ona faatino latou togafitiga i lalo o lea polokalame.

O le faamoemoe o le PSH, o le a avea lenei auaunaga ma vaega tāua o ana galuega i Samoa nei, ma fai ai ma auala e maua ai e tagata lima vaivai ma lē tagolima togafitiga faapitoa.

Saunoa le Pule Sili a le PSH, o lana vaai  mamao, e lē na o le fausia o se falemaʻi tumaʻoti i Savaiʻi. Ae o le aumaia lea o auaunaga faafomaʻi faaonaponei ma togafitiga faapitoa i tatou tagatanuu, ina ua aua ai ne’i toe tau malaga atu i atunuu mamao.

O se vaega o lea tautinoga, ua fuafua ai le PSH Samoa e ofo fua auaunaga faafomaʻi mo ē ua aafia i sauāga i totonu o aiga (victims of domestic violence and sexual abuse) e aofia ai fanau ua aafia i sauāga tau feusuaʻiga.

I le taimi nei, o ofoina atu e le PSH auaunaga faafomaʻi e leai se totogi mo tagatānuu o Fiti ua 65 tausaga ma i luga atu. Ma ua saunoa Tagaloafaaofonuu, o loo iloiloina i le taimi nei e le PSH Samoa, pe faapefea ona faatino se auaunaga faapea mo tamā ma tinā penisiona i Samoa nei.

“E mafai lava e se falemaʻi tumaʻoti ona iai ona tiute e fesoasoani ai i tagata lautele,” o le saunoaga lea a Tagaloafaaofonuu.

“A private hospital can still have a very strong social purpose..”

“E lē tatau ona avanoa auaunaga faafomaʻi faaonaponei mo nā o i latou e gafatia ona malaga atu i atunuu i fafo. O la matou vaaiga mamao, o le aumaia lea o nei auaunaga ia latalata i tagata o le Pasefika, e ala i le faatuina o lālā a le PSH i atunuu uma o le Pasefika.”

“Modern healthcare should not only be available to those who can afford to travel overseas. Our vision is to bring that care closer to our Pacific people by establishing PSH across the Pacific.”

O loo taofia mo se taimi lē tumau galuega mo le falemaʻi faapitoa ua fuafuaina mo Savaiʻi, seʻia toe faatulaga lelei pulega ma sea faalotoifale (shareholding) a le poloketi.

Greenology is Samoa’s leading provider of ICT Solutions!

O le tausaga 2016 lea sa mūa’i malaga mai ai Tagaloafaaofonuu Parvish ma taumafai e faatalanoa le fausia o se falemaʻi tumaoti mo togafitiga faapitoa i Samoa nei.

 “E leʻi tuulafoaʻia lenei atinaʻe, ma e lē o suia lava le miti mo Samoa nei, ina ia maua e tagatanuu uma togafitiga fa‘apitoa e manaomia..”

Saunoa Tagaloafaaofonuu, o ia ma i latou sa faatūina le PSH, sa matitiva ma lē tagolima aiga na ola ifo ai, ma o le isi lea mafuaaga tele o lona naunautaiga, ina ia maua avanoa tutusa (inclusive) mo tagatānuu uma, mo togafitiga fa‘apitoa latou te manaʻomia (access).

Mo lenei alo talavou a le atunuu e 14 tausaga ma si ona aiga, ua lē na o se folafolaga le vaaiga mamao a le PSH. Ae ua amata ona faatino e ala i le tuuina atu o togafitiga faapitoa o loo ia manaʻomia.

Latest posts by Staff Writers (see all)

Post Views: 1,169