Gabriel Hamunyela omukalimo waNdola okwa ti omolwa ohole yaye yoinima yanyama kounamapya, oshemufininika aete ongeshefa yoku kweya omapungu momukunda wavo mEndola moshitukulwa shaHangwena, noya eta exumo komesho tali endelele.
Hamunyela okwa ti ongeshefa ei okwei tameka eedula dadjako, omo a tameka oku kweya omapungu emaninge oufila wepungu.
“Ediladilo eli onde yapo nalo shaashi onda didilika nghee tuna oikulya yetu dingilila hatu dulu oku longamosha muyo fyee vali hatu ilandifa,” ta ti.
Okwa ti ongeshefa eshi vei tameka tete ova kala ashike hava keywa oushako vo 5kg, voo tava landifa poshitopolwa, ashike paife ohava kweya eeshako okudja po 5kg, ndele fiyo opo 50kg.
Okwa twikila kutya ovanamibia vahapu oveli pyakidila shili neengeshefa da yooloka, ashike voo ovakwatwa kedilaadilo loku yambidida ovanafaalama vavo vomEndola, shaashi vahapu ohava kala vena eteyo liwa lela lepungu.
“Fiyo opapa epungu letu ohali hakwana neenghono, omo nokuli hatu li hange hatu kalanda omapungu ketunda oshoyo koKatima Mulilo, shaashi oufila ohau li hakanwa,” ta ti.
Hamunyela okwa ti voo ihava longo shike epungu olo alike ndele ohava kala yoo noikulya yoimuna noyeexuxwa oku dilila mongehsfa yavo omo.
Okwa yelifa kutya ongeshefa yavo oya dula yoo oku yandja oilonga tai kalele kovakalimo vomomukunda oshoyo oilonga yopokafimbo ngaashi oku yeulula omaloli ngeenge aeta ostoka yomapungu.
“Molwaashi omukunda wetu oo twatula komesho tete, otwa kendabala tete oku yandja eemhito doilonga kovakalimo vomukunda wetu, opo tupule komesho nawa nomikunda dikwao,” ta ti.
Hamunyela okwati kapena ongeshefa lela tohange ihena omashongo ngaho.
“Fyee omashongo aa hatu kala twa taalela ohatu kala tuna omashina etu taa tekaateka.
Omashongo akwao ohatu longifa ashike eesola oshoyo oushina vomahooli, oo nao aninga ondilo nomafiyafano nee mokapale,” ta ti. Hamunyela okwa ti yoo oufila wavo woku landifa ohau hangika meefitola di hapu da kula moshilongo.
Loini Hainana oo eli omukalimo wandola okwa ti ongeshefa ei oye vakonda lela omaulu.
“ Okutya nghao oufila ouna ombilixa, oo vali ouwa.
Nonande ondina okambale kange komapungu ohandi dulu ngaho oku katwala keshina ame handi monomo oka filinga kange,” ta ti
[email protected]
