KATIMA MULILO – Situpu samuuna yana tibile mwanuka yaZambezi kakulubelwa kuli nakitimezi mwamezi kwaloji nesifumanwi nikuzibahazwa.

Muzamaisi wasipokola mwasikiliti saZambezi, Julia Sakuwa-Neo, nanyatezi kuli situpu saSitali Mutonga, muyahi wanaha Namibia, nesifumanwi sicimbauka mwanuka yaZambezi Labune kasamulaho paki nalizelize mapokola.

“Situpu saSitali Mutonga, muyahi wanaha Namibia yabihiwa kuli natulezi mwamezi kwaLoji yaLikute, nesifumanwi sicimbauka mabaani (Labune) ki paki yanalizelize mapokola. Situpu nesizusizwe mwamezi nikuisiwa kwalibulukelo laMubuso mwaKatima Mulilo, teñi bahabo yena nebaizo mulemuha,” nekubulezi Muzamaisi Sakuwa-Neo.

Mutonga nabihilwe kuli natondahalile kasamulaho akezahalo yamapakela Lasunda kwaloji yaLikute mwaKatima Mulilo. Kakuya kabupaki bonebufumanwi, ubihiwa kuli natilo fita kwaloji kanako ya03h00, inge abonahala kukolwa. 

Malonda bane bali famusebezi babihiwa kuli nebamutusize kumufa malobalo kuli apumule kuisa nako ya10h00. Malonda habalika kumusindeketa kumuzwisa kwasibaka seo, ubihiwa kuli nakalile kumata, akutela kwaloji nikuliba kwanuka. Paki naboni Mutonga hatulela mwanuka yaZambezi nikutapa nakonyana kufitela hasiya kubonahala.  Balubasi nebakile babulelela New Era kuli nebakile bamubona kwamafelelezo kwamukiti waSizo waMasubia, kone ayo ikola ni babañwi. 

Kasamulaho piho nefilwe mapokola nebakalile kumubata kufitela situpu hasiyo fumaneha. Lipatisiso zamapokola lizwelapili.

–anakale@nepc.com.na