OKONGO- Oshiwana shovayelele shi li moshikandjohoololo shaKongo osha pandula epangelo molwaashi ohashi kwata oshimaliwa shopeendjela opo shi dule okulanda oikulya nosho tuu oipumbiwa ya yooloka yomeumbo.
Mexuliloshivike Kundana okwa telela po omapundo ha kudi oshiwana shovayelele eli mOkongo, omo sha hoolola kutya epangelo ota li longo nelitulemo okukwashipaleka kutya Omunamibia keshe okwa mona omauwa oshilongo.
Lonia Nghiidile weedula 89 okwa ti mepundo laye oha mu di ovanhu 12 ashike aveshe ohava xupu moshimaliwa shopeendjela.
“Ngeno ka kwa li hadi kwata opeendjela ngeno osho handi dengwa kondjala pamwe novatekulu vange,” ta ti.
Okwa ti kape na omukulupe woshiwana shovayelele iha kwata opeendjela ile okaana okafiye.
“Ngeenge omukulupe kena sha omaufemba nena eshi otashi eta a kale iha kwata opeendjela shaashi epangelo oli na omilandu kutya omunhu naa kale e na oufemba woshilongo opo a dule okumona omauwa,” ta ti.
Paulus Tombe ena eedula 26 okwa ti okwa dopa ondodo onhi-10 ashike oha xupu moshimaliwa shopeendjela osho ha shi kwatwa kuinakulu.
Okwa ti okwa pandula Omupresidente woshilongo eshi a wedela opeendjala yovakulupe shaashi paife inakulu oha dulu okulanda ekutu loufila noshivelelwa ashike natango oha xupu po nokalimaliwa ke li xwepo.
Tombe okwa pula epangelo opo li kale ngeno ta li yandje oilonga kovanhu va dja momuhoko wovayelele ovo va dopa ondodo 10.
“Ngeenge onda mono oilonga mepangelo nena ohandi dulu okushakeneka meekulu ondjilakati okulanda oipumbiwa yomeumbo,” ta ti.
Okwa yelifa ta ti mepangelo omu na oilonga ihapu ya yooloka tai dulu okulongwa komunhu e na ondodo 10 unene tuu okuwapaleka. Martha Wadjai weedula 45 okwa ti okwa pandula ombelewa yakansela wavo eshi tai twikile okuandjaneka oikulya yoshikukuta kuvo.
Okwa ti moshitukulwa shaHangwena omu na ombelewa hai yandja omakwafo koshiwana shovayelele naashi otashi ulike kutya epangelo ota li fiile oshiwana oshisho.
–fhamalwa@nepc.com.na
The post Ovayelele tava xupile mopeendjela kOkongo appeared first on New Era.
