Ovanhu ve na ounghundi woulema ova tumbalekwa eshi va ningilwa oshivilo shomaulikilo oipindi kOmalindi moshitukulwa shaShikoto nelalakano lokulandifa oinima yavo ngaashi omaludi oikulya a yooloka, oimbale, omatiti nosho tuu oilandifomwa imwe po.
Omaulikilo oipindi aa okwa tameka omafiku 28 Juli ndele taa xulu onghela.
Okwa ningilwa komukunda Omalindi moshikandjohoololo shaMuthiya, mOshikoto.
Ehangano lovanhu tava lumbu noulema ledina kufamosha ola totwa po ku Petrus Nangolo Tiofilus a shiivika nawa Omndotolo Makity ou e li omuunganeki.
Makity okwa shiivika oye umwe ta longo oshilonga shiwa moshitukulwa shaShikoto, ena ohokwe yokuyambidida ovanhu ve nao ulema.
Ovanhu tava lumbu noulema vahapu mOshikoto ova mona omauwa okupitila moprograma e i ngaashi: okupewa oikutu, outemba osho yo eetundi dokulesha nokushanga.
Makity okwa ti elalakano lomaulikilo oipindi okuyandja efimaneko nokutumbaleka ovanhu ve na oulema shaashi navo ovanhu.
Okwa ti ovanhu ve na oulema ova pumbwa okuulikilwa ohole nokukwashipaleka kutya itava ningilwa okatongo.
“Ovanhu ve na ounghundi woulema navo ovanhu tava dulu oku eta po sha ngaashi omunhu keshe ta dulu okukufa ombinga yomangeshefelo. Naashi osha eta opo ndi ningi omaulikilo oipindi opo ndi yandje omhito kovanhu ve na oulema va landife oinima yavo ya yooloka,” ta
ti.
Okwa yelifa ta ti komaulikilo oipindi aa natango oku na ovanhu va dja moshitukulwa shaShikoto tava landifa oinima yavo.
“Nonande omaulikilo oipindi a nhuninwa ovanhu ve na oulema natango otwa yandja omhito kovanhu ve na ehalo lokulandifa oinima yavo,” ta ti.
Okwa ti ovanhu komaulikilo oipindi oku na outala vomalandifilo ve li 16.
“Outala vomalandifilo 10 ovovanhu ve na oulema omanga outala vomalandifilo vahamano ovovanhu va dja momudingonoko,” ta ti.
Okwa ti omangeshefelo otaa ende nawa okudja efiku lotete aa tameka shaashi oshiwana otashi holoka momwaalu muhapu okulanda oushikepengeyo vavo.
Makity okwa ti itashi ti kutya ngeenge omunhu e na oulema ita dulu okueta po sha.
“Moprogram e i ovanhu ve na oulema otava tungu oimbale, vamwe otava hongo omatiti osho yo okuteleka oukuki nokapana. Ileni mu yambidide eengeshefa dovanhu ve na oulema opo va dule oku li monena okamaliwa kavo,” ta ti.
Okwa ti Etitatu, ovanhu ve na oulema ova pewa omaano oikumbafa osho yo eenete deemwe.
“Ovakulunhu, ovanyasha nounona ve na oulema okwa li va hafa pefimbo tava pewa omaano ve udite ombili. Okwa li tava dana nokuimba omaimbilo tava hambelele Kalunga eshi va hangana na vakwao,” ta ti.
“Onda ya movakwashiwana ndele handi kongo omakwafo oikutu opo ndi dule okuyambidida ovanhu. Oikutu e i ondei yandja Etitatu,” ta ti.
Okwa ti kansela woshikandjohoololo shaMuthiya ota ka yambidida oprogram yovanhu ve na oulema noshimaliwa osho tashi ka futa ohiila yopendiki opo ve li.
–[email protected]
