Onamega – Omupresidente gwoshilongo Netumbo Nandi-Ndaitwah okwa ti oshituthi shomagongo osha simana oshoka ohashi gongaleke aantu noku ya tula mombepo yimwe osho wo okusimameka pamwe omuthigululwakalo.

Oshituthi shomagongo osha tyapulilwa moshitunda shUukwambi kOnamega moshitopolwa shaMusati, Olyomakaya.

Oshiindingili shika oshititatu tashi niingwa mUukwambi okwa li sha gongalwa kaaleli aakuluntu ya yooloka okuza papangelo nopamalelo gopamuthigululwakalo osho wo oshigwana okuza kiitopolwa ya yooloka, taya ulike noku simaneka omuthigululwakalo nomizalo osho wo iidhano.

Nandi-Ndaitwah okwa ti, oshituthi shoka oshina ongushu ya pumba oshoka ohashi tula oshigwana kumwe noonkondopeka uukumwe nombili moshilongo.

“Oshituthi shomagongo osha simana noonkondo onkene ota tu tsikile okushi yambindhindha nokushi xwaxwameka opo shi tsikile oku dhimbulukwa, no pamukalo ngoka ota tu kalekepo wo omuthigululwakalo,” ta popi ngaaka.

Omupresidente esiku ndyoka okwa kunkilile oshigwana opo oshigwana shi hulithepo iimbuluma, uulingilingi osho wo shoka tashi yematitha oshigwana, ihe shi kale nombili noku longa uuwanawa. Elenga enenen lyUukwambi osho wo omunashipundi gwomalelo gopamuthigululwakalo gaWambo Ndilimani Herman Iipumbu okwa fatula esimano lyoshituthi shomagongo.

“Omuti gwomugongo ogwa simana gu vule omiti odhindji paShiwambo omolwa iiyimati yago. Oongongo ndhoka hadhi zi komugongo ohadhi longithwa iilonga oyindji, ashike mbi ya simana okugandja omagongo nonzowe,” ta ti ngaaka. 

Ta fatula ta ti, omuti nguka ohagu kala wo uupuka hawu liwa kaantu nokutekula oondjuhwa niikwamawawa yilwe, niipatu yoongongo ohayi longithwa onga iikuni.  Iipumbu okwa fatulula  kutya oongongo ngele dha ningi oonshunga, ohadhi tameke  okuumba, ano tadhi zi komuti. 

Ta ti shoka ohashi holoka okuza momwedhi gwaFebuluali sigo oMai.

“Omagongo ohaga kolwa kaakadhona osho wo koomeme, taya hiyathana okuza puushiinda, yo taya gongele oongongo ndhoka dha adha okukolwa,” ta ti ngaaka.

Ta popi kutya oongongo ihadhi vundakanithwa noongongo dhomuti gumwe gwii ili, kehe oshitoo shomagongo oshi na oshikunwa hashi zi komugongo gwasho. Okwa ti uuna gumwe a pogola ethimbo lyomagongo, pamuthika gopamalelo gopamuthigululwakalo ihaku  pangulwa oshoka anuwa omupogoli anuwa ke li kuye mwene.

“Oompango ndhoka odha zi muuyuni wonale, onkene otwa tsikile nadho sigo onena ongesimaneko lyomuthigululwakalo gwetu,’’ Iipumbu ta popi ngaaka.

Ta ti, oshoka omugongo ohagu kolwa ashike lumwe momvula okuza momwedhi gwaFebuluali, aantu oya kala ashike haya nu omagongo ethimbo ndyoka, ano ohapu piti ethimbo ele inaaya nwa.

“Omagongo oga kala ogo ashike oshikolitha, onkene opwa tulwa oompango kutya itaku endwa niilwitho oshoka ngele ya nu ya pitilila otaya pogola. Ndyoka olyo etompelo aantu ihaaya pangulwa ethimbo lyongongola, ohaya tameke nomapangulo konima yomwedhi gwaApiilili,’’ ta popi ngaaka.  Okwa gandja oshiholelwa kutya uuna meme a pewa enkawa megumbo pethimbo lyomagongo komusamane, nena Mandala iha pewa mbedhi oshoka otaku fekelwa a nwa ongongola.  

Miina Samuel ngoka a li poshituthi shomagongo okwa li a hokololele Kundana esimano lyomagongo.

“Omagongo ohaga menekelwa ongula taga kolwa. Ohatu kutha oongongo ndhoka tu wete kutya odha adha okukolwa, tse tatu tsu neyinga lyongombe okutsipula ongongo nokuthina mo omeya ngoka taga zi mo, ee tatu tula moshiyuma shontumba,” ta  hokolola.

Ta ti, omagongo ohaga siikilwa miiyuma noshilapi kombanda, go taga tulwa mehala lya talala nawa. 

Samuel ta popi ta ti, omagongo ohaga kala mo omasiku gatatu nenge gane opo ga pye ga wape okunuwa.

Samuel okwa ti, okukola omagongo ohaku gongaleke aantu, naamboka kakwa li haya popi, ohaya popithwa komagongo pamikalo dha yooloka.

“Pethimbo ndyoka oomeme taya kolo, ohaya kala ye na omahokololo. Olyo ethimbo oohapu dhimwe kakwa li wu dhi shi to dhi uvu. Nongele ino kotoka oohapu  otadhi ka ninga po dhoye,” ta popi ngaaka.

Lovisa Naishidi tuulike omagongo esiku ndyoka okwa ti, omagongo ohaga kala ge na oopelesenda dhomalovu 4 nenge 4.5.

“Pamuthigululwakalo, omagongo tango manga inaaga tamekwa okunuwa, ohaga falwa komukwaniilwa nenge kelenga enene. Omagongo ohaga vulu okupungulwa sigo omumvo tagu landula,” Naishindi ta ti ngaaka.

Ta gwedha po ta ti,  ohaku tiwa, ethimbo lyomagongo aantu ihaya pangulwa uuna ya yona oshoka kaye shi shoka taya ningi.

Aano oohapu dhopethimbo lyomagongo ihadhi landulwa.

Martha Joel okwa gwedha po ta ti, natango oongongo ohadhi ningi oshikunwa hashi ithanwa oshinwa, shoka hashi nuwa kaanona oshoka kashi na iikolitha yasha.

–vkaapanda@nepc.com.na