OSHAKATI– Omaudhano gomahangano ga yama kepangelo taga ithanwa State-Owned Enterprise (SOE) Games oga tameke ohela koRundu moshitopolwa shaKavango East.
Omahangano ga pita po30, ga thikama po maaniilonga 4 500 oga kutha ombinga momaudhano ngoka.
Omaudhano ngoka oga dhanenwe oshikando shotango momumvo 2016 noga etwa po nelalakano okukaleka po uukumwe pokati koo-SOEs. Aaniilonga ya za komahangano ngoka otaya kutha ombinga momaludhi gomaudhano ga yooloka ngoka ga kwatela mo etanga lyokoombadhi, etanga lyomokambamba, ekondjelo lyongodhi ku talike ngoka e na oonkondo, okumatuka o4x100m kwaakiintu naalumentu, nokwoshinano shookilometa 10, nokatanga komonete kovoli.
Omaudhano ngoka ga tameke ohela otaga yi sigo omomasiku gane ga Juli.
Sha ikolelela komupopiliko gwomahango gopapangelo Karauihe-Martin esiku kwali ta popi niikundaneki okwa ti omaudhano onkene taga tsikile okukoka, nokwa nyanyukwa oshoka aakuthimbinga otaya ulike ya ilongekidha.
“Omahangano oga kutha ombinga momaudhano ngoka ga tameke ohela noga tegelelwa ga kale ga mana okudhana Osoondaha,” ta ti ngaaka.
Omusilishimpwiyu gomayalulo gomahangano gopapangelo Kenneth Matomola nuumvo oya tokola opo ya ningile omaudhano koRundu ngaashi ya kala noku ninga noondoolopa onkwawo.
Omumvo gwazi ko omaudhano ogali ga ningilwa koSwakopmund omanga omumvo ngwiya gwa zileko oga ningilwe kOshakati.
[email protected]
