Ovanambelewa koshikondo shomiti moshipangelo shEenhana ova shiivifila Ngoloneya woshitukulwa shaHangwena Kadiva Hamutumwa kutya oshipangelo osha ninga efimbo shihe na omiti domesho, omiti dounona doudu wa yooloka osho yo omiti dovanaudu vena ounghundi wopamadiladilo.
Edi oda holola kuNgoloneya woshitukulwa shaHangwena Kadiva Hamutumwa.
Ngoloneya okwa panga oshivike sha dja ko ta talele po oipangelo ya kula ivali moshitulwa shaye. Hamutumwa okwa talela po oshipangelo shaNgela osho yo oshipangelo shEenhana a tale nghee ovapangi tave shi endifa osho yo omashongo aa hava kala va taalela efiku nefiku.
“Oshipangelo shetu natango kashi na eembete da wana oku nangala ovanaudu unene ngeenge va tambulilwa meembete, osho yo omatalashe,” umwe womo vapangi ta yelifa. Oshipangelo osho tuu eshi natango osha hololela ngoloneya omakemo asho ena sha nomashina okukosha oinima yovanaudu ngaashi omalapi okeembete kutya okwa teka.
Oshikondo osho shina oshinakuwanifa shoku kosha omalapi okeemebte dovanaudu osha holola kutya oshipangelo oshina ashike eshina limwe alike lokukosha olo tali longo, nosha ninga oilonga yavo idjuu.
Kadiva ketalele po laye koshipangelo shaNgela okwa hanga yo kuna omhumbwe yomiti, na unene eshi tashi eta omumbwe yomiti moshipangelo osheshi kutya oshipangelo otashi yakula onduba yovashiindalongo okudilila moAngola efiku nefiku.
Omukulunhu wokoshikondo shokuhandja omiti moshipangelo shaNgela Leo Shipanga okwa ti oshipangelo osha ninga efimbo shi hena eengumi okudja ashike febuluali.
“Eshi oshili sha nyika oshiponga neenghono unene ngeenge tashi ya pomilele ina di amenwa, omateelelo inaa longekidwa osho yo omikifi da yooloka oku dilila momilele ina di amenwa,” ta ti.
Onghalo oya kwata oukilinika va fika po 17 moshitukulwa ovo hava tukulafana omiti osho yo eengumi noshipangelo shaNgela.
Ngeenge tashi ya kovakulupe, oipangelo natango kaina omiti deehonde da Londa odo di kwete ovakulupe vahapu monena.
Hamutumwa okwati onghalo ei oilulumika yo oidjuu unene oku tala. Eshi osho shemu kufa momutumba yeemwene a kwashilipaleke eshi tashi li nyenge.
“Oshilulumika neenghono okutuma ovanhu komaumbo omo mwa kwatelwa novakulupe va pangwa ndele inava va pewa omiti doku keli kwafa komaumbo shaashi kadi mo moipangelo,” ta ti.
Okwa ti ovakulupe vahapu paife ohava lekelwa ashike noku pewa omiti odo tadi dulu oku va kwafa nonande hado lela doudu ou tava vele.
“Eshi shilulumika neenghono osheshi kutya ovakulupe ava oha veke li hanga vena omikolo dapimbila, molwa omiti edi tava pewa shaashi odo dili po tadi dulu oku kwafa pokafimbo,” ta holola.
Hamutumwa okwa ti ota ka nyolela olopota kouministeli una oshinakuwanifa eshi, a yandje ehokololo nghee ovanhu tava mono oixuna, nomhumbwe yavo oku kwafa meendelelo.
Okwa ti olopota otai ka enda yo pamwe nomaupyakadi amwe oo a didilika moshitukulwa a pamba koikondo ya yooloka.
[email protected]
