OSHAKATI – Omupresidente woshilongo Netumbo Nandi-Ndaitwah okwa kunghilila ovapolifi vape moilonga veli kaleke kokule noulingilingi, oulunga oshoyo etauluko loveta.
Edi okwe di popya moshipopiwa shaye, osho shali tashi leshwa kominista woikwameni, omatembu, nepopilo kovakwashiwana Lucia Iipumbu koshivilo shenangeko lomadeulo ovapolifi paveta kOshakati, moshitukulwa shaShana Etitano. Nandi-Ndaitwah okwa ti ovapolifi ava nangekelwa eifano eli ove li 1380, nova hoololwa okudja koitukulwa aishe ili o 14 moshilongo.
“ Eshi mwa hoololwa noku deulwa ngaho, elalakano okuya moshiwana muka kalekepo elandulafano noveta, ndele haku eta edundakano nomakuyunguto moshiwana,” ta ti.
Okwa twikila kutya omadeulo avo okwe vapula oshimi moshipala, no ina hala eenghono davo dihepe.
Nandi-Ndaitwah okwa yelifila ovapolifi ava veli kaleke kokule noilonga yoku hekwa oshoyo oku futwamo vaninge oinima inai wapala.
“ Onda kundanekwa kutya eshi muli ngaho otamu ka tumwa keenhele dayooloka, omo mwakwatelwa neenhele domavyulo nghalo, ashike kalongeni mweli kwatela kwaashi mwa ana nena apa,” ta ti.
Okwa twikila kutya eemhito dova polifi ava odeya pefimbo oshilongo shili mowilala woimbuluma ihapu ngaashi omakwato nghonga, elongifo lomapangwe, omakwatombabyona nai kwao yawedwapo, ashike okwe va kunghilila veke litulemo voo vadule oku xulifapo oiningwanima ei. Kakukutu komatanga opolifi moNamibia Anne-Marie Nainda okwa ti, eli olo edeulo lotete momukokomoko womudo 2025/2026, oku dilila konhele yomadeulo opolifi Danger Ashipala.
“ Eshi muli ngaho ina mu deulwa osheendelela, ndele omwa deulwa nefimbo nomwa deulilika,” ta ti.
“Indeni mu ka kalelepo oshikondo shetu, nomikalo diwa oshoyo oilonga tai li monikila. Ka a meneni oshilongo shaNamibia pemhito adishe,” ta ti.
Nainda okwa kunghilila yoo ongudu yovapolifi vape veli kaleke kokule noinima ili ominge neifano lavo. Okwe vatwa yoo omukumo vake li wedeleko komaifano avo, yee teva dimbulukifa kutya eli etameko ashike.
“ Omikalo edi mwa dja nado komadeulo nadi mushikule moilonga yeni, opo ashike tamu dulu okuya komesho koshikondo omu,” ta wedapo.
–taimihaihambo2000@gmail.com
