Lahja Nashuuta
Baituti basilezi babaituta lituto zabualafi mwanaha Zambia kakulifelwa ki Likolo laMakete ni Pabalelo yaSicaba, babulela kuli bainzi mwalipilaelo zamasheleñi kakuli masheleñi akulifela lituto zabona, maino ni kuitusisa halifiwi nako kaufela mwalilimo zepeli zefelile.
Baituti babaiñolisize kwasikolo salituto zepahami sa Lusaka Apex Medical University ni Cavendish University, nebabulezi ni New Era basalati kutungululwa famabizo, mi nebaize masheleñi abona afelile mi bakatazeha kukwanisa lika zabupilo zebunolo habanze balika kufeleleza lituto zabona
“Mwalilimo zepeli zefelile, masheleñi aluna akuitusisa hasika lifiwa nihane kubile ni lisepiso kuli akalifiwa,” nekubulezi muituti yomuñwi. “Kamukwaocwalo, lusinyehezwi hahulu nako yaluna yakuituta inge lupila mwatibelelo.
Pili lusika kakala kale tatubo kapa kwamafelelezo atatubo, hañata lukupiwanga kufumana mañolo alulukulula mwalikoloti kwaofesi yebona zalitifo.
Kwaswabisisa kutungululwa fapilaa baituti babañwi ni maticele kakuli mubuso waluna upalelwa kulifa masheleñi,” nekuhatelezi muituti yomuñwi.
Nebaize nebalatelezi liswanelo kaufela zelukela kwasikolo kono bazwelapili kutalimana ni maino anyinyifaza buntu ni kuhula mwabona mwamusebezi. “Tuwelo yaluna yakweli, yeswanela kulifela maino, lico, nzila nikusebeliswa kuleka zeñwi zabutokwa, niyona haitahi kaswanelo.
Cwalecwale, neilyehile kufitelela kweli kusina mabaka afilwe.
Buñata bwaluna lituwelo zeo kona feela zelutusa.
Kulyeha kutalusa kuli maino alyeha kulifelwa, likabati liba mukungulu, likoloti zananuha ni lipilaelo zakuli lukapila cwañi halunze lubata kufumana mishukwe mwamusebezi otokwa kusebeza katata,” nekubulezi muituti yomuñwi.
Baituti babulela hape kuli lituwelo zamafelelezo zene bafumani nelilifela nako yezwa Lungu kuisa Mbuwana, nihaike haki kaufela bane bafumani. “Halusikafumana kale lituwelo zaSikulu kuisa Muimunene, mi hakuna sesibonisa kuli lukafumana lili,” nebabulezi. Baituti nebabulezi butata bobubalwa bobutaha bakeñisa tiyeho yakulifa.
“Masheleñi akulifela lituto zaluna asilimo sa2025 ni 2026 hasika lifiwa kale. Kamukwaocwalo, makepe aluna abaituti akwalilwe, kulutibela kuli lusike lwabona linepo zaluna.
Hape halukoni kuñola litatubo pili lusika lumelelwa kale ki ofesi yebona zalitifo,” baituti nebabulezi. Neba ekelize kuli baituti babañwi bakatazeha kulifela maino mi sebatalimana nikulelekiwa.
Nebabulezi hape kuli balikile kuikambota ni likolo la makete hañatañata kono bakatanyezwanga ki kukuza kokutungile kusina hande likalabo. Kulika kufumana kalabo kwalikolo la makete nekupalile mi nekukatanwi kikukuza kokuswana kokutungile, kakuli sibuabui walikolo Walters Kamaya nasaalabi foni yahae, kapa kualaba mañusa ane alumezwi faWhatsApp kamazazi amabeli.
–lnashuuta@nepc.com.na
