Abraham Mwanyekange
Ongudu yo Independent Patriots for Change (IPC) oya pula ovaleli vongudu osho yo oilyo yayo opo i longele kumwe omanga tave li longekidile omahoololo oupresidente osho yo omutumba wopashiwana a shikula ko mo 2029.
Tapopi pefimbo lomutumba wongudu koshitukulwa shErongo oshivike sha dja ko Omupedu presidente wo IPC Trevino Forbes okwa ti oukumwe, eudeko liwa osho yo elitule mo okwa pumbiwa opo kunghonopalekwe ongudu nokulongela mouwa wOvanamibia aveshe.
Eifano loukumwe ole ya konima eshi ongudu yo IPC ya kanifa oilyo yavo ihapu odula e i mwa kwatelwa novatotipo vongudu.
Mwaavo va fiya po ongudu omwa kwatelwa ovaxwaxwameki vopashilongo osho yo vokoitukulwa.
Forbes nonande kwaavo va fiya po ongudu ina tya kosha, okwa pula ovo va fyaala mongudu opo ve li tule mo mongudu.
Okwa ti ovaleli nave li kaleke kokule nokuhatwa kumwe, ta ti nava longele kumwe opo va kandule po omaupyakadi a taalela Namibia.
“Omutondi wetu akula ondjala, oluhepo, okuhaena oilonga osho yo eyandjo lomayakulo langhundipala,” Forbes ta ti.
Forbes okwa ti ongudu ota i ka ninga omahoololo ovaleli vape koitukulwa eshi ya taalela omahoololo. Ta indile oilyo opo i longe noudiininini opo veli longekidile omahoololo mo 2029.
Okwa londwela oilyo opo ili kaleke kokule noipupulu osho yo omauyelele taa andjakanekwa komalungula. Ta ti ponhele yaasho longeleni kumwe.
Forbes okwa ti IPC okwa hala oku tunga Namibia omo ovaleli tava kala veli kokule nokulonga oulingilingi osho yo omayakulo opashiwana alunduluka.
Okwa ti ongudu ota i twikile noku mona kutya oshilongo otashi lelwa melandulafano nopauyuki.
Okwa holola eudo nai laye kombinga yovanyasha vehe na oilonga. Ta ti vahapu ova mana omalihongo avo ndele fiyo opaife kavena sha oilonga.
Ta ti Namibia ola pumbwa ovaleli ovo tava eta po eemhito doilonga dovanyanyamaulu opo ku lundululwe eenghalamwenyo davo.
Forbes okwa ti Namibia olaaveshe ndele ta indile oilyo i twikile nokulongela kumwe opo ku tungwe Namibia liwa monakudiwa.
[email protected]
