Okanona komvula noomwedhi hetatu okahulitha sho anuwa ka lyatwa kohauto nokusa, sho kwali tayi shuna monima.
Sha ikolelela kiiningwaima ya holoka mehuulilo shiwike, oshiningwanima shoka osha holoka omanga anuwa omuhingi gwohauto kwali ta kambadhala okushuna ohauto monima.
Oshiningwanima osha holoka momukunda Onamukulo moshitopolwa shaHangwena.
Natango moshiningwanima sha faathana, omunamimvo 37 okwa hulitha sho ohauto kwali ta hingi yiidhenge mumwe nonkwawo.
Oshiningwanima osha holoka ookilometa 20 kondje yoTsumeb. Otaku hokololwa kutya ohauto yoJetta oya li yiidhenge mumwe noPolo sho kwali tayi kambadhala okusineya ohauto ya li komeho ya yo.
Aafaalelwa moohauto moka okwali yaka mona uuhaka no ya ehama kashona. Moshiningwanima shimwe natango aantu yaali anuwa oya hulitha sho oohauto yoQuantam osho wo Volvo dhiidhenge omutse nomutse.
Otaku hokololwa kutya oshiningwanima osha holoka ookilometa tadhi tengenekwa 30 okuza mOtavi. Opolisi oya ti omuhingi goVolvo osho wo mufaalelwa gumwe gomokabesa oya hulithile poshiponga.
Omasiku omashona ga piti po sho shiponga shi nyanyaleka osha ningwa okilometa yimwe okuza mOshakati ongula yonena moka mwa sile aantu yaali.
Sha ikolelela kuuyelele wa gandjwa kopolisi yOshana oshiponga osha holoka sho ohauto yoAmarok yiidhenge mumwe nohauto yobakkie yetanga lyegameno (NDF).
Otaku hokololwa kutya aafalelwa mohauto yoAmarok oya hulitha omanga omuhingi a zi mo ina ehamekwa.
Omuhingi gwohauto yoNDF okwali a teka omagulu agehe. Opolisi oya kala noku kumagidha oshigwana opo shi hinge nuukeka okuyanda iiponga yombaadhilila.
Ya ti, oshigwana nashi kale tashi gwanitha po omalombwelo osho wo omadhidhiliko gomoondjila.
[email protected]
