Abraham Mwanyekange
Epangelo ola yandja eemiliona N$247 koNamibia Students Financially Fund (NSFAF) okukwafela okuandjaneka meendelelo oimaliwa yovalihongi koiputudilo yopombada.
Minista wehongo, oungoba, omaudano novanyasha Sanet Steenkamp edi okwedi holola Etivali momutumba wopashiwana pefimbo ta yandje olopota yehongo.
Minista okwa ti ouministeli owa uda omakemo ovalihongi notau yandje ombili kuvo molwaashi ina u hala okuuda omuhongwa ta dopa ile itai kofikola molwa oshimaliwa.
Ta ti nonande ouministeli owuna eshiivo lomaupyakadi oo a taalelwa kovanafikola.
“Paife oha tu longo noudiinini opo tu kandule po omaupyakadi avo,” ta ti.
Pefimbo ta popi okwa ti, ondungefaneko yepangelo yoneudo oku eta ehongo loshali oyeeta elunduluko la kula moifuta yoimaliwa yovanafikola osho yo yoiputudilo yopombada pefimbo.
Okwa ti oifuta imwe ngaashi omalitambulifo oya futwa nale petameko lodula. Okwa wedako ta ti oimaliwa yoikulya, omambo osho yo yomalweendo oyo ashike ili konima. Ta ti oiputudilo oya tuma oumbapila vavo vomafutilo mu Aplili.
Okwa ti petameko lo 2026 epangelo ola futa emiliona N$ 156 koiputudilo yopombada.
Oimaliwa oyo oya kwafela ovanafikola veli shangife ina va futa nande epeni. Okwa ti mopaife oimaliwa yafika peemiliona N$30 oya futwa ovanafikola 6436 oku va vatela vakalande oikulya no mambo.
Minista okwa ti NSFAF ka kwa li ena ovanailonga vawana vadule oku mana oilonga aishe pefimbo. Okwa ti opo omukundu ukakandulwepo, ouministeli owa wedapo ovanailonga vape veli 25 novanailonga vahapu mouministeli ovashendjelwa koshikondo sha Nsfaf.
Ta ti elalakano ola ningwa opo ku hapupalwife ovanailonga voku talulula nawa eembapila ko okushiive oku futwa ovanafikola pefimbo. Okwa wedapo ta ti ovanailonga va Nsfaf ota va longo oufiku nomutenya op ova endelele oku vatela ovalongwa.
Minista okwa indila opo oiputudilo yopombada ikwafele ovanafikola nonande ove li meendjo.
“Kwafeleni oval ihongi vaye keetundi vo ta va shange omakonaakono nonande inava futa oimaliwa yeni. Yandjeni oidjemo yovalongwa manga tava futu,” ta indile.
Minista okwa ti keshe omuhongwa ita ka mona oshimaliwa shaye manga omwedi Juli ina u pwako. Ta ti epangelo ole li tulamo oku amenenapo omunafikola keshe.
[email protected]
