EENHANA- Minista woilonga noyeendifo Veikko Nekundi okwa ti okwa pandula ovanhu tava longo eepate koshitukulwa shaKunene, Ohangwena, Omusati osho yo Oshana shaashi oilonga yokutunga eepate otai ende nawa nota shi ulike elitulemo.
Oshivike sha dja ko, Nekundi okwa talela po eeproyeka tadi longo eepeta koitukulwa ngaashi Kunene, Omusati, Oshana osho yo Ohangwena nelalakano lokutula nghene oproyeka e i tai xumu komesho.
Minista natango okwa li a ninga omutumba nelelowiliki loitukulwa e i okukundafana kombinga yomashongo eepate a taalelwa komikunda nokutopolafana omayele.
Koshitukulwa shaKunene oku na opate tai longwa okudja mOpuwo -Etanga- Okangwati
Koshitukulwa shaMusati oku na opate tai longwa okudja Onesi-Epalela. Efiku olo tuu olo, minista natango okwa talela po oilonga yokutunga opate Epelela-Onesi oyo tai ka tamekwa okutunga omafiku aa.
Koshitukulwa shaHangwena otaku longwa opate okudja komukunda Ondobe fiyo Eenhana.
Oshiwana osha kala tashi mono oixuna shaashi opate Ondobe-Eenhana oi na omalambo taa dulu okueta oshiponga, onghee paife otai longululwa.
Koshitukulwa shaShana ota ku longwa opate okudja kOshakati- Omupundja- Naruvanda.
Opate e i otai tungwa kongushu yoshimaliwa eemiliona N$167.
Otai longwa moule wekilometa 90.
Minista okwa ti fiyo opapa ina didilika oupyakadi wa sha wa lopotwa pefimbo lokulonga eepate edi.
Okwa kumaida omahangano taa longo eepate a kwashipaleke kutya eepate edi oda pwa okulonga moule wefimbo olo la udanekwa.
Nekundi okwa popya ta ti eepate oda fimana shaashi otadi eta oshikondo shomangeshefelo shi ende nawa omo oshiwana tashi kala tashi longifa opate okutwala oilandifomwa yavo keenhele da yooloka. Okwa yelifa ta ti oshi li oshinakuwanifa shombelewa yaye okuandjaneka eepate koshiwana unene tuu komikunda melongelokumwe nehangano lokutunga eepate loRoad Authority.
Minista okwa ti eepate oda fimana shaashi ohadi longifwa kovanhu efimbo keshe oku ya keefikola, koipangelo nosho yo tuu keenhele da yooloka.
“Konima yeemweedi da pita okwa li nda patulula opate yongalama moshikandjohoololo shaShikunde moshitukulwa shaHangwena tai ka longifa kovanafikola osho yo okuya koupangelo,” ta ti.
Okwa ti eepate tadi longwa ngeenge oda pu, otadi ka etela oshiwana omauwa nokukandula po onghalo yokuhae na opate.
Nekundi okwa pula oshiwana shi li momikunda tadi longwa eepate opo shi longele kumwe kovanhu tava longo eepate shaashi eshi otashi kwafele oilonga i pule komesho noupu.
–[email protected]
