Elelo lodoolopa yEenhana ola holola kutya ola pungula oshimaliwa shi fike peemiliona N$30,5 osho tashi ka longifwa meeproyeka dexumokomesho modoolopa. Edi oda hololwa momutengenekwafaneko wavo woshimaliwa sho2025/2026.
Mayola wodoolopa yEenhana Omri-onn Kavandje okwa ti neudo ova nhunina eemiliona N$4,100 moku wapaleka eepate domamanya odo dili koshi yelelo doolopa noku tula eenhele odo hava pungula edu lokutunga eepate noinima ikwao ya wedwa po oluumbo opo i kale ya amenwa.
“Eemiliona N$ 3 otwa hala oku di twala koshikondo osho hashi ungaunga neemangela doku nenepeka eenhele meni lodoolopa osho yo oku wapaleka noku tala ngeenge oku li pondodo yoku tungwa,” ta ti.
Okwa twikila kutya eemiliona oN$600 000 0 oda nhuninwa oku tunga noku wapaleka onhele yetoto oku haku twalwa oimbodi nakeshe osho sha kaka ile shili pondodo ihe li nawa.
Kavandje okwa ti natango ova hala oku wapaleka olukanda lEenhana osho yo oklukulula omapandaanda kondado i fike pomayovi oN$ 300 000.
“Elelo doolopa natango ola hala oku wapaleka eenhele domataulukilo eepate di paindululwe noku kala di wetike nawa kovaendi vokolupadi efimbo keshe kondado yeemiliona N$2,” ta ti.
Okwa twikila kutya elalakano okukwafa ovanafikola va kale veshi apa vena oku taulukila unene ounona ava vashona shaashi efimbo li hapu ohashi eta engwangwano meepate.
Kavandje okwa ti natango ova hala yo oku handjakanifa oufano voku tala nokukeelela oimbuluma meni lodoolopa tava tulwa ko Phase 1.
Oufano ava ova teelelwa va kale va tungwa kondado yomiliona N$1.
Mayola natango okwa pula ovanangeshefa osho yo ovakalimo vomodoolopa va fute oishoshela yavo yokomwedi pefimbo. “Mopaife eshi hatu popi ngaha ovakalimo vEenhana ovena eendjo da fika peemiliona N$67 doishoshela yavo komwedi odo dina oku kala da futwa,” ta ti.
Okwa twikila kutya nghalo ili ngaha oyo unene oshimbide shakula mondjila yexumokomesho modoolopa.
“Natango oudjuu ou owa lyaminina po oshikefa shelelo doolopa shaashi ota li longifa unene oshimaliwa shihapu moku kwafa ovanhu ava,” ta ti.
Kavandje okwa indila ovakalimo va fike pombelewa opo va yandje omakemo avo kutya omolwashike itava dulu okufuta vo va tale kutya otava dulu oku kwafelwa ngahelipi.
Natango okwa indila yo ovakalimo va longele kumwe opo ashike tava dulu okuya komesho. Ashike nande ongaho Mayola okwa holola olupandu laye kwaavo hava wanifa po oishoshela yavo pefimbo, nokwa indila va twikile nokushininga.
[email protected]
