ONGWEDIVA- Emvula Heinz a shivika nawa DJ Deejay okwa ti okuhole okudana eengalo poivilo yomalihafifo molwashi oku na ounongo nohokwe yokuhafifa ovanhu neengalo osho yo okumwenyeka.
Okwa ti ngeenge owa hange ta dana eengalo omunhu keshe oha kala te li nyenge eudite ombili nokuimba.
Omulumenhu ou okwa ti okwa tameka okulonga oilonga yoku DJ okudja mo 2017 konima eshi a mona kutya okwa pumbwa okulongifa ounongo waye.
“Onda tameka pefimbo ndi li kosekundofikola eshi kwa li handi dana eengalo nookaume vange,” ta ti.
DJ Deejay okwa ti ota hangika mOngwediva ashike ota dulu oku ya keenhele da yooloka okumwenyeka oivilo.
“Ohandi dana eengalo odo diholike kovanhu. Novanhu ovo va shima ngeenge ova udu handi dana eengalo ohava tameka oku li nyenge shaashi eengalo odiwa doo otadi tula omadilaadilo ponhele,” ta ti.
Okwa ti pefimbo a li okamatyona okwa putuka ehole okutala ovanhu ngeenge tava dana eengalo nokumwenyeka koivilo yomalihafifo.
DJ Deejay okwa ti oha dana nokumwenyeka konhele yomalihafifo mOngwediva ya shiivika nawa ‘Wizzyman’.
Okwa yelifa ta ti ovanhu vahapu ove hole okuya keendingosho ngeenge efiku olo oye e liko ta mwenyeke.
“Ohandi xupu ashike mongeshefa yange yokuu DJ. Ohandi ende koivilo yomalihafifo ya yooloka ngaashi omafundula, omashasho, omadalo osho yo oindingili hai kala keendingosho,” ta ti.
Okwa ti ongeshefa yaye oya lundulula onghalamwenyo yaye molwashi paife oha dulu okuyambidida ofamili yaye.
“Efiku keshe ovanhu otava dengelenge eengodi tava pula nge opo ndi ye koivilo yavo ndi ka dane eenngalo. Oha shi penge omukumu wokulonga nondjungu,” ta ti.
Okwa ti ota twikile okukala ta yakula nawa oshiwana molwashi otashi yandje omukumo kovanhu opo natango ve mu dengele mongula.
Okwa kumaida ovanyasha opo va twikile okulongifa ounongo wavo molwashi otashi va etele oyuuyemo.
–[email protected]
