Mayola wodoolopa yaNgwediva Naemi Amuthenu okwa hoololwa a ninge omupresidente wehangano lo Association Local Authorities in Namibia (ALAN).
ALAN ehangano olo li li onga okanduda komalelo eedolopa moNamibia nolina oshinakuwanifa shoku kalela po omalelo eedolopa adishe.
Natango olina yo oshinakuwanifa shoku nghonopaleka omawi, omakemo, omadilaadilo osho yo omawedele po enasha nexumokomesho meedoolopa da yooloka noku kwashilipaleka kutya omawi okwa fika komutumba wopashiwana.
Amuthenu okwa ti efindano laye pondodo apa okwa li eli wete lela shaashi omahoololo eshi a ninga okwa djamo nomawi eli o 58.
Okwa twikila kutya ye ekalo laye koshipundi unene oku tula omakemo oombushe vaye moilonga unene ngeenge tashi ya keendjabi davo di wedelwe shaashi odishona unene.
“Minista wetu James Sankwasa onda udile ta ti ovaleli vomalelo eedolopa vahapu kave shi eshi tava ningi eshi veli meembelewa shaashi vahapu vomuvo kave udite ko oinakuwanifa yavo,” ta ti.
Amuthenu okwa pula kutya vo oilonga yavo otavei i longo yaukilila ngahelipi, ngeenge neendjabi davo ota di shongola.
Amuthenu okwa ti menenepeko leendjabi davo, omo ngaho moku longa noudiinini opo va dule oku kwafa ovakwashiwana vomeedolopa davo nombili.
Okwa twikila kutya natango otaka fya oshisho kutya omalelo eedoloopa okwa pewa oshimaliwa sha wana opo shi mdule oku hangakena eemhumbwe dihapu hadi kala deli hanena eedoolopa.
“Ngaashi paife ngaha omalelo mahapu okwa pumbwa oku landa eenhele da kulaelela nodihapu opo di dulwe okutungwa ndele eedolopa tadi xumukomesho ashike kape na oshimaliwa shokufuta mo oovene vomapaya vo navo ina va hala oku nyokomwa eenhele davo,” ta ti.
Amuthenu okwa ti ota ka tula yo omakemo okeedoolopa da yooloka moitukulwa aishe ili o 14 moNamibia moilonga.
Okwa indila oombushe moilonga va longele kumwe noombili needoolopa dopopepi mokuyandja omakwafo koshiwana.
Okwa ti nonande a tumbula kutya ota ka fya oshisho eendjabi davo di kale da wedelwa natango okwa hala ovaleli ava veke li tule mo moilonga yavo opo ewedelo lavo li kale yo li etifa eenghono sheli kolelela koilonga yavo.
Amuthenu okwa hoololwa pamwe na naMayola wa Gobabis Elwin Gariseb onga omupedu waye.
–[email protected]
