OSHAKATI- Aakiintu taya lumbu nuulema otaya hiywa opo ya kuthe ombinga momathigathano gokakadhona dhingi ngoka taga ka kala ko nuumvo.
Sha ikwatelela komukokoli osho wo omukwateli komeho gomathigathano ngoka Eva Josephat okwa ti oshiindingili shoka oshi li ko nuumvo mu Okotomba momasiku 31, ehala ota li ka tseyithwa komasiku gokomeho.
“Omathigathano ngaka oga mangulukila aakiintu ayehe taya lumbu nuulema awihe, okuza pomimvo 18-45. Okwiinyolitha otaku pula N$250 omanga mboka taya ka sindana taya ka pewa iinima yongushu,” ta fatulula ngaaka.
Josaphat okwa fatulula kutya okweya po nethigathano ndyoka okugandja ompito kwaamboka ya lemana, no ya li yena ohokwe yoku kutha ombinga momathigathano gatya ngaaka.
Ta ti, ompito ndyika okuuvitha wo mboka taya lumbu nuulema kutya inaya dhimbiwa yo oye niwe na yo.
“Onda kokele moshipangelo shaShakati, moka omo mwali muna egumbo lyetu oshoka meme okwali omupangi moka. Onkene onda kala mekwatathano naanulema mboka kwali haya zi moshipangelo, noku ya yambidhidha na shoka ya hala,” ta popi ngaaka.
Ta hokolola kutya ompito ndyoka oya li ye mu ulikile nkene aantu taya lumbu nuulema ya pumbwa ohole osho wo eyambidhidho okuza koshigwana.
Josephat anuwa okwa kala noku landula aantu taya lumbu nuulema kehe mpoka taya yi, iigongo, iituthi yontumba sigo ta koko, mpoka azi a ka hogololwa a kale wo omulanduli osho wo omukalelelipo momahangano haga kalele po aanulema.
“Ondali nda ningi omimvo mbali inaandi ninga omathigathano ngaka, oshoka okwali tandi sholola omolwa kaape na omayambidhidho ga gwana okuza moshigwana,” ta popi ngaaka.
Ta ti, ohashi mu uvitha nayi omanga ta kondjo okuyambidhidha okuulikila aantu taya lumbu nuulema ohole, ihe kape na omakwatho ga sha.
Josaphat ota indile wo omayambidhidho goludhi aluhe opo a tsikile okuninga omathigathano ngoka.
–[email protected]
