OKONGO- Omulumenhu omukwashiwana waAngola vati okwa dipaa omukainhu waye nekatana ndele te li mangeleke.
Oshiningwanima osha ningwa mexuliloshivike komukunda Omuwike u li moshikandjohoololo shaKongo moshitukulwa shaHangwena efimbo loufiku.
Omukainhu oye Ndeshipanda Gabriel weedula 32, omukalimo womomukunda Omuwike. Omukulunhu wopolifi moshitukulwa shaHangwena Commissioner Ottilie Kashuupulwa okwa koleka oshiningwanima eshi. Opolifi oya hokolola tai ti omulumenhu ou okwa li omunailonga womeumbo momukunda omo tuu omo.
Otaku hokololwa kutya omukainhu ou okwa dipaelwa keumbo lavo, monduda yaye yokunangala pefimbo olo kwa li a talelwa po komulumenhu ou. Opolifi oya hokolola tai ti ovaneumbo hava di keumbo loGabriel ova uda monduda yaye mu na omunhu ta kuu.
Ova endelela okufika monduda omo ashike ove mu hanga nale e li mekungu lohonde a xulifa, a tetwa komapepe nokomutwe.
Otaku hokololwa kutya omufekelwa ou e li naye nakufya paife okwa faduka po.
Opolifi oya hokolola tai ti konima yokafimbo olutu lomulumenhu ou ole li tuwa eli meemhango koshi yomuti mekove, a xulifa.
Otaku hokololwa kutya ovaholafani ava vati ova kala ashike mekwatafano lopaihole oule weemwedi mbali.
Omulumenhu ou ina fiya po omukanda tau yandje ouyelele kombinga yoshietifi shefyo laye. Opolifi oya yelifa tai ti omulumenhu ou eedula daye nedina ina di shiivika shaashi kena sha oufemba.
Oshiwana osha kumaidwa opo shi kale tashi lopota omahepeko omomaumbo pefimbo unene tuu ovaholafani ngeenge tava dengwa meehole davo.
[email protected]
