Ka letsatsi lena 10 Loetse 1961, ngaka Hamilton William Dyke ea sebelitseng nako e telele e le ngaka Lesotho koano, o ile a timela a le lilemo li 80. 

Ngaka Dyke o ne a hlahele Morija ka selemo sa 1881, a nto holela Lesotho pele a fetela mose ho maoatle naheng ea Scotland moo a neng a fihle a etsa lengolo la bongaka (MBChB). Kamora mona a khutlela Lesotho moo a ileng etsoa mookameli oa litaba tsa Lesotho tsa bophelo (director of medical services). Hamorao a sebetsa sepetlele sa Morija e le ngaka. 

Ngaka Dyke e ne e le mora oa moruti Hamilton Dyke, eleng moruti ea neng a fihle Lesotho ka selemo sa 1839 a hlaha naheng ea Scotland. O ne a nyale Morija mono a nyala Sarah, morali oa ngaka Eugene Casalis, ngaka ea bobeli Lesotho mona, eo moo a neng a sebeletsa eseng e le sepetlele sa Scott kajeno. 

Ngaka Eugene Casalis e ne e le mora oa moruti Eugene Casalis ea neng a tle Lesotho ka selemo sa 1833 e le emong oa baruti ba pele ba Lesotho. 

Moruti Hamilton Dyke ke eena ea neng a “pholose” Thomas Mofolo ea neng a lelekoa ke sekolo sa Morija ka selemo sa 1898, ka lereng Thomas Mofolo o kolota sekolo fisi. Moruti Dyke o ne a hane ha sekolo se leleka Thomas Mofolo, a re eo a itsoellepele ka sekolo, tsa patala li tla ‘ne li bonoe. Eaba Thomas Mofolo ea neng a le lilemo li 22 feela ka nako eo, o khona ho qeta sekolo. A fetoha sengoli se hloahloa sa libuka. 

Fotong ke batsoali ba ngaka Hamilton William Dyke, eleng moruti Hamilton Dyke le ‘mamoruti Sarah Dyke.