Dem three envelopes!
Sep 19, 2025
Kaieteur News – Dem boys seh Burnham deh pon he deathbed and de country bin in a state. Economy flat like piece a clap bread, and shortage all over de place. Burnham call in Desi and hand him three enevlopes. He seh, “Boy, if you end up in a jam yuh can’t handle, open one.”
Well, Desi tek de envelope and put dem in he drawer. Fuh de first few months, tings smooth like oil. But six months in, de economy tek a next lash. Pressure start come from all corner. Desi remember de envelopes and open de fuss one. It seh, “Blame yuh predecessor.”
Desi call press conference quick. He seh it was Burnham socialist ting mek de country in dis state. De party grumble but seh leh we give Desi a chance. Next ting yuh know, de economy start look nice again. Desi start breathe easy.
But dem boys seh good times don’t last long. A year later, de economy tek a dive again. Desi seh, “Is time fuh envelope number two.” He open it, and it seh, “Reorganize.” Desi shuffle up some people, change some plan, and bam! De economy bounce back again.
Couple years pass and pressure come from de unions this time. Desi seh, “Boy, is envelope number three now.” He lock he door, sit down, and open it slow. De message seh, “Prepare three envelopes…”
Dem boys seh when Janet gone, she lef three envelope too. But she mek sure she label dem, “Fuh Bharrat.”
Talk half. Leff half.
Discover more from Kaieteur News
Subscribe to get the latest posts sent to your email.
