OMAFO- Pefimbo ta patulula okapale ketanga kEeshoke Chula Chula, Omupresidente Netumbo Nandi-Ndaitwah okwa ti okapale aka oka fimana shaashi ota ka etela ovanyasha omauwa okukala taa ningi omadeulo.

Okapale aka oka patuluka Olomakaya, omo Omupresidente oye a li omupopi wefiku a fimana.

Okapale oka tungwa ke li mOmafo modoolopa yaHelao Nafidi, keli meni lendiki olo ha li ningilwa omaulikilo oipindi.

Ovadani vetanga vospana Eeshoke Chula Chula, ovakwashiwana sha dja mOhangwena osho yo ovaleli vopapolitika okwa li va holoka momwaalu muhapu okupwilikina kewi lOmupresidente eshi ta patulula okapale.

Efiku olo, Eeshoke Chula Chula oda ya mokapale okukondjifafana nospana Might Gunners oule wominute ashike 30, nelalakano lokuulikila Omupresidente nghene tava danene mokapale kavo kape oshikando shotete.

Nandi-Ndaitwah okwa popya ta ti osha fimana ngeenge keshe moshitukulwa mu na okapale komaudano shaashi eshi otashi yandje omhito kovanyasha va longife ounongo wavo tashi pitile momaudano.

“Okapale aka oka tungwa ke li pashinanena. Okapale oko kotete ke li moshitukulwa shaHangwena ke li pamufika woshinanena,” ta ti.

Okwa ti epengalo ota li twikile okutunga oupale vomaudano koitukulwa ya yooloka.

Okwa yelifa ta ti epangelo natango ole li pyakidila okutunga oupale vomaudano koikandjohoololo ya yooloka.

Okwa weda po osha fimana ngeenge ovanyasha tava i kondje yoshilongo tava ka kalela po Namibia komakondjifafano oudano. “Otashi ulike efano liwa Namibia ta findana momaudano kondje yoshilongo shaashi otashi ulike kutya mboli ovanyasha ove na ohokwe yokulitula mo momaudano avo,” ta ti.

Okwa yelifa ta ti natango okwa pandula ovakainhu, osho yo ovanhu hava kufa ombinga momaudano a yooloka moshilongo ngaashi okulotoka.

“Oudano ohau hanganifa oshiwana okuhafela pamwe osho yo okuxwaxwameka oukumwe mokati kovanyasha nokeefikola,” ta ti. Okwa ti okapale aka kape naka longifwe nawa okuyandja omhito kovanyasha va kale tava ningi omadeulo osho yo okuunganeka omafiku omaudano.

Omupresidente okwa kumaida ovanyasha aveshe ve na ohokwe yomaudano opo ve li tule mo okukala tava ningi omadeulo.

“Omadeulo omaudano okwa fimana shaashi otaa longekida ovadani okukala tava kondjifafana navakwao. 

Ngeenge ospana youdano inai li longekida, nena otai dulu okudengwa shaashi iha ningi omadeulo,” ta ti.

Okwa pandula elelo lodoolopa yaHelao Nafidi eshi la eta po okapale aka shaashi otashi ulike oshihopaenwa shiwa moshiwana.

Mayola wodoolopa yaHelao Nafidi, Darius Shaalukeni okwa ti odoolopa yavo otai twikile okueta exumokomesho popepi noshiwana.

Okwa ti okapela aka oka kala nale taka pulwa kovanyasha molwaashi ohava ka danena kOshakati.

 –[email protected]