ONGWEDIVA- Ovanhu ve dule po 350 ova kufa ombinga moudano wokutondoka womaulikilo oipindi aNgwediva neudo.
Omwaalu ou, owa kwatela mo ovanhu aveshe ovo vali veli shangifa okukufa ombinga mokutondoka omudo ou.
Ovanhu ova kufa ombinga okukondjifafana okutondoka oinano ya yooloka.
Omaulikilo oipindi okwa tameka Etitano notaa ka xula momafiku 29 omwedi ou.
Ngaashi naana shi li omukalo ndjiikilile, omaulikilo oipindi otaa kala mendiki la kula laNgwediva omo ha mu ningilwa oipindi.
Paife ngaha otashi kala oshikando 25, elelo lodoolopa yaNgwediva ta li ningi omaulikilo oipindi.
Omaulikilo oipindi aa okwa fimana shaashi ohaa nane ovanangeshefa tava di kondje yoshilongo osho yo koitukulwa ya yooloka.
Ovanhu ova tondoka oinano ya yooloka ngaashi 21.1 KM, oshinano sho 10KM osho yo oshinano shee 5KM.
Oshinano sho 21.1 KM oshe li shangifwa ko N$100, oshinano sho 10KM oshe li shangifwa ko N$75 omanga oshinano sho 5KM she li shangifwa ko N$50.
Ovanhu va findana ova pewa eembadi da yooloka she li kwatelela koshinano osho omunhu a kufa ombinga.
Elalakano loudano wokutondoka ou, okuhanganifa oshiwana, okuhafela pamwe tashi pitile moudano.
Omunhu keshe okwa manguluka okukala eli shangifa a kufa ombinga momaudano aa shaashi okulotoka okwa fimana noku li oshitopolwa shokuninga omadewo.
Omaudano aa okutondoka okwa ningwa pefimbo eefikola di li mefudo, novahongifikola ova holola ehafa kutya navo otava ka kufa ombinga okutondoka.
–[email protected]
