Ua fa’amaonia mai e le Fa’amasinoga o Fanua ma Suafa le suafa matai o le “Laaulialemalietoa” a le afioga i le Palemia, lea ua toe fesiligia i nisi o tuuaiga a le Afioga i le Taitai o le Itu Agai.

O le vaiaso nei sa tuuina atu ai e le Ofisa o Faamasinoga o Samoa se tusi i le Failautusi o le Fono Aoao Faitulafono, e faamaoniaina ai le suafa o le Afioga i le Palemia.

O le tusi a le Faamasinoga i le Aso 14 Aukuso 2026 o loo sainia e le Ofisa Sili o le Matagaluega, o ia fo’i o le Resitara o le Faamasinoga o Samoa, le Afioga ia Papalii John Taimalelagi.

O lo’o tali atu ai le Ofisa o le Faamasinoga i se talosaga a le Failautusi o le Fono Aoao Faitulafono mo se kopi o le faaiuga a le Faamasinoga o Fanua ma Suafa e uiga i le suafa “Laaulialemalietoa”.

O le faaiuga ALC7657 a le Faamasinoga o Fanua ma Suafa i le Aso 25 Iuni 2025, “o loo faamaonia ai e le Faamasinoga le fa’asa’oina o le suafa matai o Leuatea Polataivao Fosi i le suafa Laaulialemalietoa.”

I lena lava faaiuga sa poloaia ai fo’i e le Faamasinoga o Fanua ma Suafa le Resitara, ina ia faasa’oina ma faamauina aloaia le suafa Laaulialemalietoa, i luga o le Tusi Matai poo le Resitara o Matai Samoa.

O le mataupu lenei ua tele taimi ua  faalauiloa ai le tāofi o le Afioga i le Taitai o le Itu Agai ia Tuilaepa Sailele Malielegaoi i luga o upega tafailagi, ma ia tuuaia ai le Palemia i lona faaaogaina o le suafa Laaulialemalietoa.

Tā’ua e Tuilaepa i lana feiloaiga ma tusitala i le vaiaso na tea nei, e leai se suafa  “Laaulialemalietoa” ae na o le “Laauli” se’i tulou.

“Ou te fesiligia lona agavaa e avea ma Palemia i lalo o le suafa o le Laaulialemalietoa.”

“Ou te fesiligia ai le faamasinoga o Fanua ma Suafa ona ou te talitonu e le’i uma aiaiga ae ua ave le faamaoniga.

“Faapefea ona tupu lea mea ma ua faamaonia mai e le Peresetene i lana tusi mai ia te au, o loo iai le apili.”

Peitai, o lea ua toe tusi atu le Faamasinoga o Fanua ma Suafa i le vaiaso nei, e toe faamaonia le maea ai ona faamaonia le suafa “Laaulialemalietoa” a le Taitai o le Atunuu.

Latest posts by Staff Reporter (see all)

Post Views: 773