Abraham Mwanyekange

Ongudu yokatanga kokeemadi ya yambukile komukunda Onamula moshitukulwa shaShana oye shi pondola oku findana po omaudano ayo opatatu ekondjelo loku ya kolixa yotete yokoumbangalanhu uninginino yomoshilongo. 

Omaudano okwa liko oshivike sha dja ko kOutjo kokapale komaudano kEtosha.

Okamwandi momafiyafano oka denga mo Future Football Club yokoshitukulwa shaMusati 6-0. Oudano utivali oka denga mo Okalindi okudja koshitukulwa shaKunene 5-1 omanga oudano utitatu ka denga mo Spoilers 1-0 ndele taka kwashilipaleke onhele yako kolixa yotete modula yo 2026/27.

Okamwandi oka totwa po mo 2012 kovanamukunda Onamula nelalakano okudana okatanga kokeemadi momidingonoko.

Mo 2022 Ovanamula ova ninga oshiongalele omo va tokola opo ongudu i kufe ombinga molixa yaShana ititatu.

Molixa yaShana Okamwandi oka ninga mo ashike eedula mbali ndele take shi endifa nawa okuya kolixa itivali yaShana, no mopaife konima yeedula 14 Okamwandi oka uka kolixa yotete moshilongo.

Omukulunhu wOkamwandi Raphael Nuumbembe odula eyi okwa lombwela Kundana ta ti petameko kakwa li vena sha.

“Ofye ashike ospaana mOshana tu na okapale komaudano kena emate. Ovadani vetu ove na ondjabi yokomwedi, otu na obesa yospaana novaleli vetu ove na elongelo kumwe liwa,  osho osho shimwe shomwaayo ta i tu xumifa komesho nawa,” ta ti.

Nuumbembe okwa ti elalakano lavo oku ya kolixa yopombada moshilongo moule wodula imwe.

Omafiyafanepo makwao okuya kolixa yotete yokoumbuwanhu oshilongo oku liko oshivike eshi ta a ka danenwa kOmaruru, omo eengudu domaudano okudja koshitukulwa sha Khomas, Erongo, Hardap oshoyo Kharas ta di ka kufa ombinga.

[email protected]