Ehangano a li futile ovalihongi ve li koiputudillo yopombada loNamibia Student Financial Assistance Fund “NSFAF” ola yelifa kutya oshikonga shovalihongi aveshe ava inava futwa okafilinga kavo otava ka futwa kexulilo laJuli neudo.Ouyelele ou owa yelifwa komukulunhu woshikondo shemona mo NASFAF Eveline Anghuwo a ti kutya oshikondo shavo osheli pyakidila nokumanifa oinima aishe opo ovalihongi ovo va ninga efimbo, va dule okufutwa.
“Otwa tameka nale okututa po ovalihongi vamwepo, molwaashi omwaalu owa ninga muhapu, ohatu kendabala ngeno tu kale twa futa ovalihongi 1615 mefiku opo ashike omukalo udule oku endelela,” ta ti.
Anghuwo okwa twikila kutya ovalihongi ava va kala nale hava mono oimaliwa ei komwedi, voo otava ka pewa oN$ 9600, oyo tai ka kwatelamo eemwedi adishe edi inava futwa okudja ashike mu Apilili fiyo oJuli.
“Ovalihongi vape opo va yi koiputudilo neudo ova teelelwa va kale va futwa oimaliwa yavo aishe poshikando, shima ashike eembapila davo odo tadi ulike kutya ovelishangifa koiputiudilo yopombada da wanifwapo, noipumbiwa aishe oyo va kala nokupulwa koNSFAF vei wanifapo. Omupilima woshilongo Elijah Ngurare oo naye ali aka pupaapupako keembonge da NSFAF, okwa ti eshi shemukufa momutumba oku katala kutya ehengano olili fiyo openi mokupitifa oimaliwa yovalihongi ava.
“Onda hala mu kale mwafya oshisho kutya ovalihongi avashe ava veli koshivalo shokukala va mona oimaliwa ei kexulilo lomwedi ou ove shiningilwa ngaashi naana mwa udaneka,” Ngurare ta yelifa.
Ovanafikola vahapu moNamibia unene ava vokoiputudilo yopombada ova ninga efimbo lile tava mono oixuna molwaashi ova kala va teelela oimaliwa yavo ndele keshe fiku omafiku oku mona oshimaliwa shavo shokulikwafa otaa unduliwa ashike komesho.
Umwe womuvo Pomwene Mwoonde okwa lombwela Kundana kutya yee haye naana adja poondinyaa ndii hanga, neteelelo loshimaliwa eshi ola kala ta li muxupifa noudjuu.
“Ovadali keumbo navo osho va tameke okulimbililwa voo vamwe tava kalya neendjo opo ashike va dule okuxupifa omaludalo avo,” ta ti.
Ngaashi vakwetu vamwe nokuli ovaninga lela efimbo hava faula eetundi shaashi kapena oshimaliwa sholefa.
“Oshili ohandi kapandula ngeenge NSFAF okwe tu dimbuluka,” ta ti.
[email protected]
