Sitata saVenduka elikwamo lyawo lyokugava rutjeno ngesi kuna kuza nye vakagave rutjeno komambo gokusika ko 1298 korukanda oru vatunga vantu omu vana kuyimona asi kuna kugendapo moomu vayiharera, omu yina kara asi sirugana kwankenye evango kuna kuza vakasimane omu ndango zina kutamununa sirugana sazo sokutwara yirugana pepi novantu.
Nompitisili dositata, sigendo oso kagendesere mukurona pamberewa Moses Matyayi ntani vakansela, kavakadingwire noprojeka dokulisiga siga, muna hamene evango lyaMix lyokutunga vantu, moutano una puko omu kavahere kukalitarerako vene asi yinke yina kugendako kutunda tupu apa projeka vazitulire mosirugana mokwedi kwa Kudumogona mvhura zeezi. Matyayi katente asi mudigu ogu kagukere tupu nye gokukalikida vatungimo asi yinke eyi vana tura mosirugana kukwama etokoro lyovakansela nokulikida asi ndango kuna lituramo unene vawapukurure eparu lyovantu ava vatunga komariukanda vasingonona asi gokutunga.
‘’ Ose kunahara tupu kudiviosa vatungimo moVenduka asi eyi yiyo vana kara nayo vakansela noprojeka edi dina kara asi nare vaditura paveta vaditameke,’’ yimo ana kutanta ngoso apa vana kukadingura evango lyokutunda lyaMix, lyakara komuzogo gositata. ‘’ Omu nye moMix evango lyokutunga, ose kwayaturamo projeka zorutjeno ketameko tupu lyomvhura zeezi, nye ngesi ose tuna hafa mokuyamona asi hawe elikwamo kuna kugendapo nawa. Mokukwama mwendi age Matyayi, rukanda rwaMix projeka, ezi nazigwanekedesa mambo gokusika ko 267 korutjeno nye rodoropa, ngesi kuna kara nye ponoperesenta 80% vazimane. ‘’ Eyi kuna kara tupu yokurutura ndi varugwanekedese.’’
Ose tuna hafa unene kweyi yina kuhoroka dogoro paapa,’’ yimo ana kutanta, nokugwedako asi ekuliko lyangesi kuna kara tupu nye lyoyimaliwa yopkusika koN$6 miliyuna, omu muna hamene yimbangu yoyinene ntani noramba domononzira. Sigendo simpe kasikatere projeka zorutjeno koTobias Hainyeko, oku kuna kara 491 mambo aga vana kukatura rutjeno. Ntani 260 mambo aga vana kukatura rutjeno koMoses Garoeb, ano 280 mambo nye gana kukagwanenamo mauwa ko Otjomuise nawo vamwe vana kugwana mauwa aga. Kansela Ivan Skrywer, ogu nage kakere gumwe gosigendo sokudingura mavango aga, katente asi edinguro lyangesi kuna kulikida nye elituromo lyondango zovakansela omu tuna kuyatara asi dene edi noprojeka twatura mosirugana dina sikimo tupu nawa mosirugana. Nampa
