Okwa didlikwa ounona veedula dinini va ninga oihakanwa yokukwatwa onghonga koshitukulwa shaMusati omo okaana keedula nanho ka kwatwa onghonga kokamatyona keedula 18 osho yo okaana keedula 11 oko ka kwatwa keenghono kumushiinda.
Oshiningwanima osha ningwa mexuliloshivike komukunda Omaambo moshikandjohoololo shaTsandi moshitukulwa shaMusati efimbo lomutenya.
Omukulunhu wopolifi moshitukulwa shaMusati Commissioner Ismael Basson okwa koleka oshiningwanima eshi.
Opolifi oya hokolola tai ti nakuninga oshihakanwa okwa li aka teka omeva pondobe.
Otaku hokololwa kutya omufekelwa okwa hangika aka ya sha oudila pondobe yomeva opo tuu opo.
Opolifi oya hokolola tai ti omufekelwa okwa heka okaana aka ndele tai nako keumbo lavo.
Omufekelwa ou vati okwa longela okaana omunyonena wopaixulo ndele ta faduka po .
Otaku hokololwa okaana oka ya keumbo ndele taka shiivifile ovakulunhu vako.
Opolifi oya ti omufekelwa okwa kwatwa po efiku olo a longa oshimbuluma.
Okwa holoka momhangu yaKahao onghela ashike ine pewa omhito yokulifutilamo modolongo.
Natango, oshivike sha dja ko koshitukulwa shaMusati okwa lopotwa okakadona keedula 11 ka kwatwa onghonga kumuushiinda wako. Oshiningwanima osha ningwa komukunda Omuthigomanya moshikandjohoololo shaKalongo.
Opolifi oya kumaida ovadali opo va tonatele ounona vavo shaashi paife ova ninga oihakanwa yokukwatwa onghonga.
Opolifi oyya kumaida yo ovadali opo va findikile ounona keefikola shaashi eshi otashi kwafele va kwatwe onghonga ngeenge ve li moixwa. –[email protected]
