Abraham Mwanyekange
Omudani wokatanga kokeemadi waNamibia Peter Shalulile okwa fiya po ospana yoMamelodi Sundowns omwedi wa dja ko eshi etwo kumwe udafano lavo leya pexulilo.
Sundowns okwa ninga eingido oshivike eshi kepandja lavo lo Facebok ta yandje epandulo ku Shalulile molwa oilonga iwa alonga ko Sundowns moule weedula hamano a kala naye.
Ovayambididi vomaudano okatanga kokeemadi ova yandja omaliudo avo eshi eingido la ningwa komalungula.
Shalulile oo ha ifanwa nedina ‘Sha Sha’ kovayambididi vo Sundowns, okwa waiminina oSundowns mo 2020 okudja kongudu yo Highlands Park. Sundowns na Park adishe eengudu detanga da South Africa ha di dana molixa yopombada moshilongo omo.
Sundowns a pandula ‘Sha Sha’
Sundowns oye shi luka ‘efimbo la Shalulile’. Momushangwa wavo wokomalungula ovashangamo ta vati
“Tangi unene kekoola wa tula mo. Tangi ketyapulo pamwe nafye. Tangi kondjokonona watula po oyo hatu kala nokudimbulukwa efimbo alishe, tangi Sha Sha,” Sundowns ta ti.
Mamelodi okwa ti nonande ‘Sha Sha’ a fiya po ongudu ota kala nokudimbulukiwa onga omutulimo wekoola dingi. Ovemu pandula molwa omakopi a vena navo osho yo elongo laye loudiinini mokambidja ka Sundowns.
Sha Sha oule weedula hamano akala ko Sundowns okwa dana omaudano 228.
Momaudano omo okwa tula mo ekoola 107 ndele ta yandje omatanga 27 kovadani vakwao navo vatulemo. Shalulile kali ashike omutulimo wekoola ndele okwa li omuleli yo.
Omapapa noSundowns
Pefimbo laye ko Sundowns okwa findana omapapa mahapu. Okwa vena ekopi lo lixa yopombada ya South Africa oikando ihamano. Okwa vena ekopi lo Nedbank, ekopi lo MTN8, ekopi lomanyakwa espaana da Africa osho yo o Confederation Africa Championships.
Opaumwene
Shalulile okwa findana onga omudanitanga dingi molixa ya South Africa oikando ivali, omutulimo wekoola dihapu oikando itatu.
Okuli oye ena ekoola dihapu molixa ya South Africa pandjokonona oshoyo mekopi lo Nedbank. Okuli onga omutulimo wokoola yaendelela mekopi lo MTN8 moule ashike weesekonde 10. Oye ashike afindana po omutulimo wekoola dihapu moule weedula nhatu, kapena vali umwe eshi ninga.
Ovayambididi vaye
Ovayambididi vo Sundowns ova ulika eudo lavo lonai nonande ovena etumba. El Hangwi okwa ti otashi udifa nayi.
“Ashike enyakwa mokundaanisha olishi kutya efimbo lilipipo liwa lokudja mondabo. Otumu hole notwemu fimaneka,” ta ti. Gintse Faith okwa ti kakwa li eli longekidila Shalulile ta fiyepo Sundowns.
Ovashikuli va Shalulile moNamibia ova ulika etumba.
Nangolo Johannes okwe mu luka omuumbi dingi.
“ Ondjokonona oyo wa tunga po ota i kala po efimbo lile. Ondeku halela ouwa monghalamwenyo yoye ipe yokomesho,” Johannes ta ti.
Nambahu Martin okwa ti okuna etumba komwenyo.
“Otwe ku pandula kaana ketu. Tangi eshi watulifa epandela laNamibia pombada. Ove okwa li omu ambashada muwa pondje yoshilongo,” ta ti.
Shalulile fiyo opaife ina popya kutya ota ka waimina ospaana ilipipo. Nonande pena omapopyo kutya ospaana ya Zimbabwe yedina Scotland oya ulika ya hala iye naye meenghundafana natango kape na ouyelele wa koleka omapopyo aa.
Kundana ina dula okukwatafana naShalulile pefimbo lenyanyangido lehokololo eli.
–[email protected]
