Opolisi moshitopolwa shaShana oya yuula metale lyomeya omidhimba dhaanona yaali, okamati nokakadhona, yomimvo heyali ayehe oshiwike shika.

Aanona mboka oya sile metale momukunda Onamambili, moshikandjohogololo Ondangwa Rural .

Sha ikolelela kopolisi yaShana aanona mboka okwali taya litha anuwa popepi netale mpoka. 

Shi ikwatelela kehokololo lya gandjwa, aanona mbaka oya kambadhala ya ka tale anuwa eloya metale ya ka dhane.

Otaku hokololwa kutya aanona mboka oya gwile mo nokusa omeya.

Okanona komimvo omugoyi hoka ya li pamwe nako oko ka ka lopotela aakuluntu kutya yakwawo a li nayo oya gwila metale.

Opolisi moshitopolwa shaShana oya kumagidha aakuluntu ya sile aanona oshimpwiyu konima ya dhimbulula

kutya omaso guunona wu na oomvula oonshona otaga yi pombanda.

Taya ti aakuluntu naya sile aanona oshimpwiyu.

“Omeya oshinima sha nika oshiponga, unene kaanona. Onkene oya pumbwa okusilwa oshimpwiyu ethimbo alihe,” ya ti ngaaka.

Oya gwedha po tayi ti aakuluntu naya kumagidhe aanona kaaya dhane popepi nomeya, yo ya kale kokule nomithima, omatale osho wo oondungu dhomeya.

-vkaapanda@nepc.com.na